Dunay dakong implikasyon sa sitwasyon sa Pilipinas ang hiniusang pagtingog sa Japan ug South Korea batok sa agresibong mga gipanghimo sa China diha sa South China Sea ilabi na sa West Philippine Sea.
Sa ekslusibong panagkita sa mga lider sa maong mga nasud didto sa Maryland, USA, sila si South Korean President Yoon Suk Yeol ug Japanese Prime Minister Fumio Kishida parehong nipagawas og pamahayag batok sa China.
Talagsaon kini nga panghitabo, kay bisan tuod og pareho silang kaalyado sa Amerika dinhi sa Asya-Pasipiko, ang South Korea dako og pagdumot sa Japan tungod sa nahitabo sa World War II.
Apan tungod aning agresibong gipanghimo sa China, nagkasinabot ang duha nga kun magpadayon kini ug dili masanta, hasta ilang seguridad ug ekonomiya maapektahan, kay ang South China Sea, agianan sab sa ilang patigayon ug komersyo.
Karon pa usab nahitabo nga ang duha ka mga nasud mipagawas og bug-at nga mga pulong batok sa China.
Ang South Korea ug Japan pareho sab nga nahulga sa North Korea, ang bata-bata sa China nunot sa pagsige niining panghulga paggamit og armas nukleyar batok kanila.
Ang duha mipagawas sab og pamahayag nga kinahanglang sundon sa China ang 2016 Arbitral Ruling nga nag-imbalido sa pangangkon sa China ug miila sa katungod ug soberiniya sa Pilipinas sa WPS.
Ang gihimo sa duha posibleng makaapektar sa estratehiya sa China sa SCS. Ang China, sama sa South Korea, nabiktima sab sa Japan niadtong World War II, ug gigamit sa China ang kayugot sa mga Koreano ngadto sa Japan aron duwa-duwaan ang duha.
Giangkon sab sa China Ieodo Reef sa ubos nga bahin sa Jeju Island sa South Korea. Samtang ang Senkaku Islands sa Japan gusto sab ilogon sa China. Apan karon nga nagkahiusa ang duha batok sa China, dili na magamit sa China ang WWII war crimes sa Japan.
Kun kaniadto mag-iyahay ra ang duha pag-atubang sa China, karon dili na. Kining pagkahiusa sa duha batok sa China, dugay nang gustong mahitabo sa Amerika kay mas makapalig-on kini sa iyang posisyon batok sa karibal nga nasud. Kini maayo sab para sa Pilipinas.