'Amper' nga balaod

Mahinungdanon alang sa Bureau of Fisheries ang pag-angkat og dili momenos 35,000 ka metriko tonelada nga isda aron walay masinati nga pagnihit niini atol sa closed fishing season gikan sa Oktobre ngadto sa Disyembre ni’ng tuiga.  Makapangutana lang kita kon dili ba diay dungan ang atong closed fishing season sa uban’g nasud kay ngano nga makaangkat man kita’g isda gikan kanila?  Basin baya kon ang ato ra’ng mananagat ang did-an samtang ang mga langyaw libyano ra kaayo makapanagat.  Mao na’y giingon sa akong silingan nga, “Ka-amper sad ana.” Muleeeng!

Pangwarta ang tuy?

Giaprobahan sa Kongreso ang balaodnon nga nag-usbaw sa limit sa galastohan sa kampanya sa mga kandidato ug mga partido politikal sa panahon sa eleksyon.  Giamendar ang balaod kay ang daan nga limit sa galastohan gilatid niadtong tuig 1991 pa ug dili na kini haum sa kabag-ohan tungod sa inflation.  Dinhi sa Pilipinas, sulagma ra kaayo nga modaug ang kandidato nga walay kwarta, bisan unsa pa unta siya ka-angayan botohan.  Hinuon, naay molansad dili sa tuyo nga makadaug kon dili aron usab makakwarta.  Mao na’y giingon nga milansad “Just for the FUND of it.” Pagkatuytoy!

Hapit na magpa-tuli

Gipahinumduman ni Cebu Governor Gwen Garcia ang mga kandidato sa umaabot nga Barangay ug Sangguniang Kabataan Elections (BSKE) sa pagpatigbabaw sa kalinaw ug kahapsay sa eleksyon sa ilang lugar uban ang paghangyo nga dili mag-personalay sa ilang pagpangampanya.  Makapahinumdum sa manag-kumpare nga nagkaatbang sa paglansad pagka-kapitan.  Gisukmatan sa usa ang iyang kaatbang tungod kay gisangyaw kuno sa naulahi atol sa rally niini nga pisot kuno siya.  Gipanghimakak kini sa iyang kumpare sa pag-ingon nga, “Wala man ko mosulti nga pisot ka Pre; ang ako giingon nga ‘Hapit na ka magpatuli.’” Tua raaa!

Pilde ang katawhan

Supak ang mga kongresista sa mga lalawigan sa Negros sa gisugyot ni Finance Secretary Benjamin Diokno nga sugar import liberalization diin tugotan na ang mga food and beverage manufacturers nga direkta’ng moangkat og asukal.  Usbaw sa bulohisan ang tumong sa sugyot ni Diokno; pagpanalipod sa lokal nga industriya sa asukal ang gipatigbabaw sa mga kongresista. Tataw nga sa baruganan sa matag habig, ang gipatigbabaw mao lang ang kaayohan sa mga negosyante ug mga haciendero ug dili ang kaayohan sa kinabag-an.  Pilde na pud ang katawhan.  Fezteleern!

Dili unta magpadakop

Namahayag ang Department of Foreign Affairs nga dili tamdon sa Pilipinas ang fishing ban nga giluwatan sa China diha sa West Philippine Sea.  Alang sa DFA, ilegal ang maong kamanduan kay gilangkob man niini ang maritime zone sa Pilipinas.  Sama ra nga miingon ang China nga “Ang amo, amo; ang inyo, amo gihapon”.  Dili lang tingale pagsang-at og diplomatic protest ang atong buhaton ni’ng lain nga pagbully sa China sa Pilipinas.  Hangyoon usab nato ang mga isda diha sa WPS nga mo-welga batok sa China ug nga dili unta sila magpadakop sa mga mananagat sa China. Atala lagee!