Usa sa sukaranan sa kataas sa nakab-ot nga kahibalo sa mga kabataan mao ang kahanas nila sa pagpasa ug makasabot sa kun unsa ilang gibasa.
Apan sa nanglabay nga mga research sa mga batid sa edukasyon, daghan sa mga batang nag-edad og 7-anyos hangtud 10-anyos maglisod og basa, samot na ang pagsabot kun unsa ilang gibasa.
Gani mas lisud pa gyud kini bisan sa mga naa sa high school kun English na maoy asignatura ang hisgutan. Sigurado nga nakaapektar og dako niini ang nakalabay nga pandemiya, dihang gihimo nalang ang distance learning pinaagi sa modular ug online classes.
Wala na matutoki kining batakang leksyon nga itudlo sa mga bata ilabi na niadtong naa sa Grade 1, kini mao ang pagbasa.
Apan nasayran nga dili lang gyud Grade 1 ang nabiyaan, kondili naa pay hangtud sa Grade 4 nga mga bata ang naglisod pa gihapon og basa, samot na ang pagsabot kun unsa ang ilang gibasa.
Nabatyagan kini sa mga magtutudlo sa dihang unang nabalik ang face to face classes ning tuiga, daghan sa mga batang na-promoted sa sunod nga grade level ang kuwang sa kahibalo nga unta ila nang nakat-onan.
Apan kadtong panahon nga unta ilaha kadtong tun-an, mao man sab ang panahon sa modular o online classes diin wa gyud magka-atubang ang mga magtutudlo sa ilang mga tinun-an, samtang ang nag-online classes, limitado ra sab ang naka-avail niini tungod kay daghan ang walay gadgets o walay internet sa balay.
Kining programang nahunahunaan sa Department of Social Welfare and Development (DSWD) inabagan sa Department of Education (DepEd) "Tara, Basa!" tutoring program makatabang aning problemaha.
Gawas nga makatabang kini sa mga batang dili pa makamao mobasa, magsilbi sab kining part time job sa mga tinun-an sa kolehiyo nga nagkinahanglan og pinansyal nga tabang kay sila maoy himuong tutor sa mga bata aron tudloan silang mobasa.
Maayong himuon kini tibuok Pilipinas aron masigurong kompleto sa gikinahanglang edukasyon ang mga henerasyon sa kabataang Pilipino.