"Rightsizing"

Human gibadlong sa Commission on Audit sa pagpatuyang og panghire og mga job order workers, gipahibawo ni Cebu City administrator Collin Rosell niadtong Lunes atol sa flag ceremony sa City Hall nga ipatuman nila ang rightsizing sa mosunod nga tulo ka buwan.

Matud ni Rosell nga mao ni direksiyon sa administrasyon ni Mayor Michael Rama karon nga mitingog na ang COA kalabot sa labihan ka daghan sa JO workers sa dakbayan.

Sigun sa taho nga dunay kapin sa 3 mil ka JO workers ang syudad sa kasamtangan. Apan dihay higayon nga miabot gyud og kapin sa 5 mil.

Nanghunaw hinuon si Rosell ug misuway pagpamahid sa bulilyaso ngadto sa laing administrasyon.

Sigun niya nga di si Rama maoy nagdawat niining maong mga JO apan wala na siya mohatag og dugang detalye. Kun di si Rama kinsa man diay mayor nga mipirma sa kontrata sa maong mga JO?

Rightsizing maoy termino nga gigamit ni Rosell, ang pangutana pila man kabuok JO ang kinahanglang ibilin aron maisip nga mao ni ang hustong gidaghanon?

Ug unsa may garantiya sa pobre nga mga kawani nga nagsilbi nga JO sud na sa pila ka tuig nga performance ang basihan sa pagpanaktak ug di politika?

Ang tinuod dili tanang JO way trabaho ug nagpasinaw lang sa bangko. Gani ang ubang JO mas kugihan pa kay sa regular nga mga kawani nga nagsalig nga di na sila daling mapapha sa trabaho.

Dako hinuon ning hagit unsaon pagpatuman ang gitawag nga rightsizing nga di maligsan ang mga kaalyado sa politika sa mayor.

Nasayod ta sa realidad nga ang mga JO dunay mga padrino sa politika. Andam naba mo risgo ang mayor nga masilo ang iyang mga kaalyado nga nagsilbing padrino sa mga JO nga maapektuhan unya sa ilang rightsizing?

O kutob lang gihapon ni sa pasiatab sama sa kampanya batok sa mga malapason sa easement?