EDITORYAL - Cinderella run sa Filipinas

Naputol ang gihulagway nga “Cinderella run” sa mga Pinay nga football players nga Filipinas nga maoy nagrepresentar dili lang sa nasud didto sa nagpadayong 2023 Australia and New Zealand FIFA Women’s World Cup Division A didto sa  New Zealand.

Ang Filipinas gipukan sa mas lig-on ug mas iladong team sa Norway s iskor nga 6-0. Apan bisan pa man sa maong kapildihan, mura ra og wala panumbalinga sa koponan kay para kanila dako na kaayo kadto nga kalamposan ang makaabot sa World Cup.

Tinuod, dili kamahayan ang nahitabo sa Filipinas sa mga kamot sa Norway, kay una sa tanan, ang Norway naa sa ika Rank No. 12 samtang ang Filipinas naa sa Rank No.46 sa FIFA Women’s World Cup ranking. Ang Norway nakasuway na nga nahimong champion sa FIFA World Cup.

Ang Pilipinas karon pa sukad-sukad nakaabot sa maong level bisan pila ka tuig na kining nisalmot sa mga international competition. Gawas nga nakasulod sa World Cup, nakadaog pa gyud batok sa mismong host sa maong torneyo nga New Zealand, 1-0.

Bisan gani ang sikat kaayong Philippine Azkals nga maoy nagrepresentar sad sa nasud sa men’s national football team wala pa sukad nakatunob sa pitch sa FIFA World Cup level, apan nahimo kini sa Filipinas.

Ang mga Pinay sa World Cup nagrepresentar dili lang sa Pilipinas, kondili hasta sa mga nasud sa Association of Southeast Asian Nations (ASEAN) isip mananaog sa nakalabay nga mga kompetisyon ning bahina sa Asya.

Bisan ang mga netizens sa mga nasud sa ASEAN ug South Korea nga nakakita sa duwa nakadayeg sa Filipinas ug gibati sab sila og dakong garbo sa dihang napildi niini ang New Zealand sa kaugalingon nilang tugkaran.

Maayong suportahan gihapon ang Filipinas sa sunod pa nilang mga kampanya ug dili angay ikaguol o ikauwaw kay nabuhat nila ang wala pa sukad nabuhat sa uban, ang makasulod sa FIFA World Cup level.