Naalarma ang United Nations bahin sa gihulagway nilang “excessive use” sa mga cellphones ug ang sobrang pagsalig nalang sa mga estudyante niini para sa ilang pagtuon ug pagtungha diha sa ilang mga eskuylahan.
Ang United Nations Educational, Scientific and Cultural Organization (UNESCO) sa ilang gipagawas nga global report bahin sa teknolohiya sa natad sa edukasyon, nakita nga walay klarong regulasyon ug tamdanan para niini ang mga tunghaan.
Ang maong report nga gititulohan og “Technology in education: A tool on whose terms?” giingong nagpakita nga sobra-sobra ang pagsalig sa mga tinun-an sa mga smartphones ug gadgets sa ilang mga research ug pagtuon.
Tungod niini ang 2023 Global Education Monitoring Report nanawagan sa mga gobiyerno sa kalibotan nga i-regulate ang paggamit niini sa mga tinun-an. I-sentro ang ilang pagtuon pinaagi sa “human-centered vision” o kaugalingong panglantaw ug pagdiskubre sa leksyon ug gamiton lang kining teknolohiya isip kaabag ug dili maoy gisaligan sa ilang pagkat-on sa leksyon.
Mao kini ang rason nga dunay mga kabataan karon nga “advance” na kaayo tungod sa gadgets ug cellphones, apan bisan gani sa simpleng pangutana sa leksyon, dili makatubag o wala makahinumdom nga naa diay niini.
Kana tungod kay gamay nga pangutana o problemang kinahanglang matubag o masolusyonan adto man dayon dagan sa ilang bestfriend nga “Google Search” ug uban pang search engines sa internet gamit ilang mga cellphones.
Tungod sab niini, daghang mga kabataang nasobrahan na ka expose sa digital technology ang nameligro nga mabiktima sa identity theft, data leaks ug uban pa.
Si UNESCO Director of Global Education Monitoring, Manos Antoninis miingon nga sa tibuok kalbotan nga nigamit na karon sa modernong technolohiya, 16 porsiyento lamang ang dunay data privacy sa ilang mga tunghaan. Usa pa, nakita sab dinhi sa Pilipinas ang epekto sa kalidad sa edukasyon pinaagi sa online classes panahon sa Covid-19 pandemic, daghan sa mga bata ang nabiyaan kay dili tanan makamao mogamit sa internet, kun sa mga primera-klaseng mga nasud anad na ilang mga anak og digital learning, dinhi, kadto rang mga anak sa adunahan o tubigtubigan maoy makamao.
Mao nga nanawagan ang UNESCO sa tanan nga balansihon ang paggamit sa teknolohiya sa edukasyon sa mga bata, apan kinahanglang dili wad-on ang teacher-student engagement ug sa samang paagi tudloan sila sa hustong paggamit sa teknolohiya alang sa mas maayong edukasyon.