Nag-anam kadaghan ang mga tag-as nga building nga gipangtukod sa lainlaing dapit sa Cebu City. Kon ayuhon lang sa Cebu City Assessors Office ang pagkwenta sa real property tax niining mao nga mga building, dako ta’g makolekta nga buhis.
Maayo unta og wa na diha kadtong mga kawani kaniadto nga mga tapolan, ug motuo lang kon unsay isulti sa mga tag-iya sa building kon pila ang itug-an kanila nga gidak-on ug maoy basehan sa bayran nga buhis.
Tiaw mo usa ka bangko diha sa Magallanes gipabayad lang og P2,600 nga buhis, nga dako pa gani ang buhis nga gibayran sa yanong vendor sa Colon nga namaligya og plastic cellphone accessories.
Ang real property tax sa mga building, ibase kana kon pila ang gidak-on niini.
Kon taas ang building, mas dako ang real property tax nga bayran sa tag-iya, kana kon ayuhon sa Assessors Office ang pagkwenta.
Basta kay dili gyud maglisud ang Cebu City government sa pagpangita og kwarta nga gastohon sa mga proyekto, kon ayuhon lang pagkwenta ang bayronon sa mga tag-iya og real property units ug business firms.
Aw hinuon, bag-o na ang gibutang ni Mayor Michael Rama nga hepe sa Assessors Office, ug nadunggan nako nga kadtong mga empleyado kaniadto nga dugay kaayo mo-approve og mga permits kay maghuwat og padangog, gipangtangtang na.
* * *
Bahin sa problema sa baha, akong awhag sa kadagkoan sa Department of Engineering and Public Works (DEPW) nga susiha ninyo ang gitukod kaniadto nga mini-dam sa kabukiran.
Ang mao nga mga mini-dam, gitukod atol sa termino ni kanhi mayor Tomas Osmeña, ug usa niini naa dapit sa ibabaw nga bahin sa nahimutangan sa Mahiga Creek.
Tumong sa pagmugna sa mao nga mini-dam aron nga ang tubig, masawod usa ngadto sa dam, ug dili dayon mopaingon sa sapa. Sa ato pa, kon kusog ang pagbunok sa uwan, kinahanglan usab nga mapuno sa tubig ang mini-dam usa pa makaagas ang tubig ngadto sa sapa.
Aron masabtan pag-ayo, sa ato pa dili dayon magbaha sa mga lupa nga bahin dinhi sa siyudad. Apan ang problema karon kay base sa akong nahibaw-an, ang maong mga gitukod kaniadto nga mini-dam sa lainlaing dapit, napuno na sa mga lapok.
Kinahanglan na kining habwaan aron magamit na usab sa iyang katuyoan. Ambot nahibawo pa ba kaha ang mga opisyal nato karon sa DEPW kabahin sa giingon nako nga mga mini-dam nga gitukod kaniadto panahon sa administrasyon ni Tommy.
Ipasusi kuno ninyo ma’am bi.