EDITORYAL - Motagam kaha?

Eye opener. Mao kini ang pamahayag ni PNP Chief Benjamin Acorda Jr. para sa mga polis mahitungod sa pagpakiglambigit sa pipila nila ka mga sakop sa mga sindikato sa ilegal nga drugas.

Una niini, si Presidente Ferdinand Marcos Jr. mibutyag sa iyang State of the Nation Address niadtong adlaw nga Lunes nga 18 ka mga level 3 police officials nga niduso og courtesy resignation ang iyaha nang gidawat.

Nagpasabot kini nga kaning 18 ipaubos sa makuti, lawom ug subsob nga imbestigasyon kabahin sa mga alegasyong nalambigit sila sa mga sindikato sa ilegal nga drugas sa nasud. 

Daan ng namahayag si DILG Secretary Benjamin Abalos Jr. nga gidasonan sab ni Marcos nga dili mapakgang kining pagkuyanap sa ilegal nga drugas sa nasud kay dunay mga polis nga nalambigit niini.

Gani dili palang dugay nakontrobersiya sab ang PNP tungod 42 kilos nga shabu nga gibanabanang moabot P6 bilyones ang giingong gikawat sa mga polis nga nangronda. Napasakaan na og kaso ang mga polis nga nalambigit niini.

Dili lamang kadtong aktwal nga nalambigit sa negosyo sa ilegal nga drugas kondili tanan, klaseng kabuang ug malapason sa balaod nga binuhatan sa mga polis, dili na unta nila buhaton ug seryusohon kining eskandalo nga nahitabo sa organisasyon.

Kini sama sa pag-planted og ilegal nga drugas o ebidensiya ngadto sa mga madakpan suspek aron mapun-an ang ilang kaso tungod kay sila notoryos nang mangunguot o kawatan ug uban pang petty crimes.

Dili lang ang ilegal nga drugas ang nakaguba sa imahe sa kapolisan, bisan ang mga ginagmay nilang pasekretong paglapas sa balaod aron lisud-lisuron ang ilang mga dinakpan o ba kaha aron mapasayon ug dili sila mahago sa ilang trabaho bisan inosente ang gipasanginlan, makaguba sab kini sa ilang dungog kay makahasol ug makaguba man kini sa kinabuhi sa natungnan.

Kaning gibuhat sa PNP, DILG ug ni Marcos makapatagam unta kini sa mga polis nga padayon pa gihapong nagbinuang sa serbisyo.