Akong gitan-aw ang video ni Pura Luka Vega nga nihimo sa iyang Ostiya Review. Ang maong kantalitang review nahimong na culminate sa iyang paghamal sa tibuok hostiya. Maayo gyud siya modala og hamal. Sa kinatibuk-an iyang gihatagan og mga 8.5 percent rating ang maong Ostiya gikan sa 10 percent total rating. Hinuon, dili konsgrado ang maong Ostiya apan bisan pa man kun kini dili konsagrado apan nigawas gihapon kini nga usa ka matang pagbugalbugal. Gibuhat ang tanan, makuha lamang ang gitinguhang kasikat ingon man income basin daghan ang mo send og stars. Ang gitinguhang kasikat ni Pura Luka Vega ang wala makahatag og inspirasyon ngadto sa kadaghanan. Nakita nga ang iyang gihimo usa man ka binhi sa kasilag ug kaligotgot. Bisan gani si Arnel Ignacio nagkanayon: “Ang Sarap mong Sampalin!” Naghinobra ang ang ka Queer ning tawhana!
Dunay pipila ka pangagpas nga mahimo natong mapupo kalabot ning maong insidente. Kini naglangkob ning mosunod:
1. Buot niyang ipamugos ang iyang katungod nga sa tanang panahon isip queer kinahanglan siyang sabton ug dawaton. Dawaton mahimo apan sabton? Ambot lang labina kun iyang ipamugos ang baruganan nga dili haum ug nakapasakit na relihiyosong sentimento sa uban.
2. Nangangkon siya ingon nga magtutuo apan sa ngalan lamang apan wala sa buhat.
3. Dili tingali maayo ang iyang kasinatian sa Simbahan mao nga nangita lang siya og hustong panahon aron moladlad sa iyang pagbati.
4. Naglagot pud tingali siya sa Ginoo kay nahimo siyang lalaki bisan gusto niyang mamahimong babaye.
5. Naglagot siya sa iyang kaugalingon kay siya mismo ang wala malipay sa iyang kaugalingong mugna. Nagpakatawa siya ug gihimo niya ang iyang kaugalingon nga kataw-anan aron siya dawaton sa kadaghanan. Luoya pud kun mao.
Sa maong akto sa paghamal atong nakita nga kining tawhana buot molamoy sa tanan aron siya mabusog ug matagbaw mokaon ug mo-enjoy nga hawa sa pamalandong ug bisan daghan na ang iyang natulon magpabilin siyang dili makontento hangtud sa hangtud. Ang busong padayong mohasi kaniya ug luyo unya sa iyang katawa tan-awon nato kun may kalipay ba. Unta mahanaw gikan kaniya ang mga negatibong pagbati, panlantaw ug pamatasan. Atong pangayoon nga mamahimong maputli siya.