Bugalbugal sa pagtuo sa Ginoo

Klaro na kaayo ang presensiya sa demonyo sa kalihokan sa uban nga wala na gani mogamit pa og takuban o krimen aron sila mailhan kon dili deretsahan na ang ilang pag gawas sama nalang niining usa ka influencer kuno o drag queen nga nibastos sa pagtuo sa mga Kristyano pinaagi sa pagsul-ob og biste nga susama kang Hesus ug labaw sa tanan ang paggamit sa pag-ampo nga mismo si Kristo ang nagbungat ang Amahan Namo o Ama Namin sa tinagalog.

Ang The Lord's Prayer ang labing balaan ug gamhanan kay gikan sa atong Manunubos apan gigamit kini sa usa ka sakop sa demonyo pagbugal bugal sa atong Ginoo.

Matud sa influencer nga pagpadayag kini sa art ug estilo sa iyang pag-ampo. Seguro tinuod pagpakita sa iyang pag ampo sa yawa pinaagi sa pagyama yama sa atong Manunubos.

Adunay katungod ang matag usa kanato sa pagpadayag apan walay si bisan kinsa ang gihatagan og exemption sa pag-abuso niining maong katungod sa pagbugalbugal sa uban.

Kining maong personalidad sakop kini sa grupo nga nanglimbasog nga mahatagan og respeto sa katilingan, apan naghatag kini og mantsa sa grupo niya diin siya nahisakop.

In fairness sa LGBTQIA+ ilang gikondenar ang gihimo sa usa sa ilang miyembro. Gani usa ka magbabalaod nga sakop LGBTQI-A ang hugtanong nisaway ug nikondenar sa aksiyon sa naasoy’ng personalidad. Angayan lang pud nga badlongon siya.

Sa tanang grupo aduna man gyuy mosukwahi nga gikinahanglan nga adunay mopakgang aron dili madamay ang dungog sa uban.

Abi nako og sa ubang nasud lang tataw ug dayag na kaayo ang pagsimba sa kangitngit, apan nahitabo na kini karon sa atong nasud. Dili man deretso nga gipakita nila ang pag simba sa lord of darkness apan sa ilang aksyon mao na gyud ni.

Ang CBCP, mga magbabalaod ug ubang grupo nipakita na sa ilang kadismaya ug pagkondenar sa gihimo sa influencer. Apan kutob lang sa expression, wala silay himoon niini? Kong diri lang kutob nahadlok ako nga duna pay mga mosunod nga himoon ang kampon sa demonyo pagyatak sa  imahen sa atong pagtoo kang Hesukristo.

Kong nagtinguha kita og respeto, kinahanglan makahibawo usab kitang morespeto sa atong isig ka tawo bisa  managlahi man kita og pagtoo. Apan ang respeto wala na kana mauso sa mga tawo nga nibali na sa ilang pagtoo sa demonyo.

Apan ang gahum sa Ginoo ang mopatigbabaw ug kadtong nagbugalbugal Kaniya moani sa Iyang paghukom inig abot sa adlaw sa panudya.