Niining naghinapos nga mga adlaw sa iyang termino isip pangulo sa Sangguniang Kabataan Federation sa dakbayan sa Sugbo, tinguha ni Konsehal Jessica Resch nga dad-on sa Singapore ang 13 niya ka mga staff.
Ilang tumong sa byahe mao ang pagtambong sa "Cross-Border Learning Session Towards a Singapore-like Cebu City” nga gitakda sugod karong Hulyo 19 hangtud sa 22.
Tuyo sa grupo ni Resch nga makakat-on sa kahibawo ug mga maayong practices unsaon pagpalambo sa syudad ngadto sa usa ka "livable" ug "sustainable city" gamit ang inspirasyon ug kasinatian sa Singapore.
Bisan og unsaon pa nila og palami sa mga pulong aron lang makalusot --lakwatsa ra gyuy lintunganay niini.
Tugotan ta nga tinuod manambong sila og seminar ug seryoso silang makat-on, unsa may gahom ug puder niining 13 ka mga casual ug job order workers nga lakip sa mobiyahe?
Sigun sa listahan nga gisubmiter ni Resch ngadto sa buhatan sa bise mayor alang sa travel authority ania ang mga pangalan sa mga mobiyahe paingon sa Singapore: Angel Jet Alcuizar, admin aide I; Stella Marie Apao, job order; Jose Lou Bacunawa, senior admin assistant III; Kyle Genson, security agent II; Juvelyn Manayon, security agent I; Dwight Mozo, private secretary I; Dominic Nacua, admin aide IV; Mario Pabroa, executive assistant II; Clyde Ponce, job order; Kenneth Rafols, private secretary I; Jess Anthony Dela Cruz, executive assistant III; Fritz Sabell, executive assistant I; ug Rose Ann Tangente, admin aide IV.
Sigun sa mga gihuptan nilang katungdanan, unsa may katakos nila pagpatuman sa kun unsa may ilang makat-onan sa ilang byahe?
Sa kabahin Resch, isip miyembro sa konseho, mahimo siyang mopalabang og mga resolusyon o ordinansa apan mag-agad gihapon ni sa kabubot-on sa executive department.
Gawas pa dyutay nalang ang panahon nga nahabilin alang ni Resch sanglit eleksiyon na sa Oktubre.
Way magbuot og gusto gyud si Resch nga ibyahe sa Singapore ang iyang mga staff, apan kinahanglang iyang personal nga kwarta ang gamiton ug dili ang salapi sa mga magbubuhis.