EDITORYAL - Patuyang og gastos sa kwarta sa gobiyerno

Daghan ang miisa ang kilay sa matud pa bag-ong opisyal nga logo sa Philippine Amusement Gaming Corporation (PAGCOR) ug miani kini og daghang mga pagsaway gikan sa mga netizens diha sa social media.

Dili lang ang desinsyo niini nga may pagka-parehas tan-awon sa logo usab sa usa ka oil company ug dili sab ang pagka simple niini ang gisaway sa mga tawo kondili ang matud pa gigastos sa maong korporasyon sa pagpahimo niini nga moabot og P3 milyones.

Kun tinuod kini nga mao kini ang gigastos sa pagpabuhat o pagpadesinyo lang sa maong logo, natural nga sawayon gyud kini sa mga magbubuhis.

Ang maong matud pa opisyal nga logo nga dunay kolor pula ug blue sama sa Bandila sa Pilipinas, sa tan-aw sa mga netizens dili mokantidad og P3 milyones.

Kamahal gud niini nga logo, nga kung buot tan-awon bisan kinsang graphic artists diha sa sidewalk sa dalan Colon mas nindot pa og trabaho o desinyo nga mabuhat, dili pa gyud moabot bisan P500 ang bayad.

Sa pagkangalan nga sa gobiyerno ang PAGCOR, angay sab unta silang magtihiktihik sa kwarta sa katawhan ug dili usik-usikan.  Ang pangutana sab, gikinahanglan ba gyud ilisan ang logo sa maong korporasyon nga pila ka dekada naman kining gigamit?

Naalkanse ba diay o naapektahan ba diay ang kita sa PAGCOR gikan sa mga legal nga pasugalan ug casino sa nagkadaiyang mga hotels ug ubang mga lugar dunay operasyon niini tungod sa ilang karaang logo mao nga ilaha kining ilisan?

Unya kun gikinahanglan gyung ilisan, ingon niana diay kadako ang gastos sa pagbuhat sa maong logo?  Pila naman ka mga kabus nga pamilya ang kayang masalbar sa maong kantidad?