Hangyo ug pahinumdom na pod

Nanawagan ngadto sa publiko ang Administrador sa National Irrigation Administration (NIA) nga si Eduardo Guillen sa paghunong na sa pagusik-usik sa pagkaon nunot sa posibilidad sa pagnihit sa pagkaon tungod sa El Niño phenomenon nga naghulga sa produksiyon sa humay dinhi sa nasud.

Ang pagusik-usik sa pagkaon ang usa sa dakong hinungdan sa pagkakulang sa pagkaon, hinungdan nga mihangyo kini sa publiko nga kun dili mahurot ang usa ka tasa nga pagkaon nga humay, katunga lang ang paliton o kaonon. Gihangyo ni Guillen ang pagtinabangay.

Gihangyo usab sa administrador ang mga lokal nga kagamhanan sa paghimo og igong pagpangandam aron maminosan ang epekto sa huwaw sa tagsa-tagsa nila ka mga hurisdiksyon. Sa pagusik-usik sa pagkaon ang akong mahinumduman mao ang tubag sa bata ngadto sa iyang apohan dihang kini gipahimangnoan.

Ang apohan mipahimangno sa iyang apo nga iyang nakita nga nagusik-usik sa pagkaon. Iyang giingnan ang iyang apo sa dili pagusik-usik sa pagkaon tungod kay daghan ang gipanggutom kay wala silay makaon.

Ang tubag sa apo: “Unya lolo og akong hutdon og kaon kining kanon, mabusog silang gipanggutom?”

Pilosopo nga pagkabata. Pero basin pod og pareha ang uban kanato og tinubagan sa bata.

Ang presidente sa Philippine Chamber of Agriculture and Food Inc. (PCAFI) nga si Danilo Fausto mipahimangno nga ang El Niño naghulga sa supply sa pagkaon sa nasud sunod tuig dungan sa pagsaway sa Departamento sa Agrikultura (DA) tungod sa kakuwang sa kongkretong lakang sa  pagminos sa epekto sa huwaw. Bisan klaro ang programa sa DA mahitungod sa El Niño apan walay klaro ang pagpatuman niini.

Si Fausto nagkanayon nga dugay na nga nag awhag ang mga mag-uuma ngadto sa DA sa pagpatuman sa mga gikinahanglan nga pagpangandam aron seguro nga ang mga mag-uuma makapananum gihapon bisan sa tinghuwaw.

Ang problema, bungol ang DA nga gipangulohan mismo ni Presidente Ferdinand “Bongbong” Marcos Jr.