Kaniadtong Domingo sa gabii, nag-atang ko og taxi sa M. C. Briones Street kilid sa Cebu City Hall. Nag-uwan pa gyud mao nga nihit kaayo ang mga taxi nga way sakay.
Nakabantay ko nga pagkadaghan sa mga dakponon sa atong mga driver nga nag-drive og taxi. Una, posible nga gipaagi ra nila sa sabot-sabot ang plitehan, wa iagi og metro.
Nganong nahibawo ko? Kay kon i-on na gani ang digital fare meter, ang wiring-design niini mao nga ang suga sa atop sa taxi mapawong ang word nga “vacant,” ug mopuli ang “Occupied.”
Gitumong ni aron ang mga pasahero nga gustong mosakay og taxi, makaila kon ang taxi nga nagpaingon sa ilang nahimutangan, bakante ba, o adunay sakay.
Daghan sab nga mga Topload lights sa mga taxi nga nagsiga man tuod, pero nagdungan pagsiga ang vacant ug occupied. Ang uban sab wa gyud magsiga ang suga sa Topload.
Dihang LTO deputized agent pa ko kaniadto, apil ni sa akong gipang-isyuhan og TOP aron maleksyon ang mga driver nga obligasyon nila ang pagtan-aw nga dili depektoso ang mga lights sa gimaneho nilang sakyanan.
Hangyoon nako ang mga road law enforcers sa LTO, Highway Patrol ug Traffic Group, apila’g tan-aw kining mao nga mga taxi sir, ug pangdakpa ang wa makatuman sa balaod.
* * *
Gisugyot nako ni Mayor Michael Rama nga kinahanglang duna gyud untay grupo sa mga kawani sa Cebu City government nga moatiman sa mga libaong sa karsada.
Pero giingnan ko ni Mayor Rama nga naa na kuno’y gitugyanan niana nga trabaho. Ang pangutana hain man? Unsa may gihimo nila nga wa man lagi maatiman ang mga libaong?
Kining mga kawani nga gitahasan ni Mayor Rama sa maong mga gimbuhaton wa tingali makakita sa kahimtang sa Echavez Street unahan sa taytayan paingon na sa eskina Sikatuna.
Suwayi ra gud ninyo pag-agi, kon dili ba makaingon mo nga angay na gyud kining ayuhon. Kon padayon kamo nga dili magtagad sa maong problema, ang mayor maoy madaot tawon sa pagsaway.
Wa magkuwang ang mayor sa paghatag og kamandoan, apan ang problema mao ang mga tawo nga gitahasan sa trabaho nga nagyaka lang tingali.
Ikaduha, ang kapitan sa hingtungdang barangay kon asa ang karsada mahimutang, siyaro na man sab pud og dili mo makatapak bisan graba na lang.
Kamong mga dagkong opisyal sa Cebu City Engineers Office, palihoka na ang inyong mga sakop aron maatiman na kining mao nga problema.