EDITORYAL - Tentasyon sa kwarta

Nanggawas ang duha ka matang sa tawo sa nahitabong pagbuhagay sa mga kwarta diha sa South Road Properties niadtong nakalabay nga adlaw nga Martes sa buntag dihang aksidenteng naguba ang bag nga gisudlan niini samtang gibiyahe sa kolektor sa usa ka money remittance center.

Sa mga nakapunit sa kwarta nga miuli niini ngadto sa kolektor, nagpakita lang sa maayong kinaiya ug pamatasan nga ilang gidak-an ubos sa pagmatuto sa ilang mga ginikanan. Siguradong ikapasigarbo sila sa ilang ginikanan.

Ang dili pagpamintaha sa uban, usa ka maayong gawi ug hiyas nga dapat naa sa tanan. Maayo sila nga panag-ingnan ug ehemplo para sa kabataang Sugboanon.

Ang uban kanila wala magkinahanglan niadtong mga kwartaha nga ilang gipamunit maong ilaha kining giuli, apan duna say mga niuli niini nga nagkinahanglan gyud sa maong salapi apan mas mipatigbabaw ang ilang maayong pamatasan ug konsensiya. Bisan dili na sila tagsa-tagsahon pagpaila sa publiko, angay gyud silang pasalamatan ug dayegon tungod sa ilang maayong pagkatawo.

Sa pikas bahin, duna puy klase sa tawo nga naa anang higayona, sila kadtong mga bentahoso sa hilom o mga tira-binta nga mga tawo, sa laktod nagbawon sila pirme og tentasyon sa ilang inadlaw-adlaw nga kalihokan.

Tingali ang lukso sa kasing-kasing tungod sa panginahanglan nila sa kwarta ug ang nasayon lang kay nagbawon naman silang daan og tentasyon aron makaangkon og daghang kwarta nga walay hago.

Sobra-sobra gyud ilang dalang tentasyon adtong panahona mao nga wala sila maminaw sa ilang konsensiya sa dihang ilang gipanulod sa bulsa, belt bags, delivery boxes sa motor, duna pay uban nga de-sakyanan ug gidala ang kwartang dili ilaha. Kini bisan  paman nagtiyabaw ug hangyo ang kolektor nga nakakita sa ilang gipangbuhat.

Sa mata sa balaod makonsiderar kadto nga pagpangawat, usa kini ka krimen. Kun unya mailhan na sila tungod kay aduna may mga CCTV ug mga viral videos nga nakuha samtang sila namunit ug nangikyas dala ang kwarta, mahimo silang dakpon ug dako ang kahigayonan nga mapriso kun mapatud-an sa hukmanan.

Tinuod nagkinahanglan ang tanan og salapi, depende kun asa nila kini gamiton, apan dili unta sa pamaagi sa pagpamintaha ug pagpanglupig sa uban nga kaparehas ra nga nagkinahanglan pud.