Daw nag-uwan og kwarta sa South Road Property (SRP) niadtong Martes dihang nahibos ang backpack sa usa ka kolektor samtang nagmaneho sa iyang motorsiklo diha sa coastal road. Ang kolektor paingon na unta nga mo remit sa gibana-banang tres ngadto sa kwatro milyones niyang koleksyon ngadto sa ilang buhatan sa Mandaue dihang nahitabo ang aksidente.
Matud sa kolektor nga natinga siya nganong nagkaguliyang ang mga motorista nga nagsunod niya. Dihang iyang gitan-aw sa samin sa iyang motorsiklo nanglupad ang kwarta gikan sa iyang backpack.
Dali niyang gibalikan ug nagpakiluoy sa mga namunit sa kwarta nga iuli intawn kay dili ni iyaha ug nga posibling siyay makabayad niini sa ilang kompaniya.
Dihay naluoy ug miuli sa kwartang ilang napunit apan diha gyuy daghang kawatan nga wa manumbaling bisan naghilak nga nagpakiluoy nila ang kolektor.
Matud sa kolektor nga sagad sa wala manguli mga delivery rider. Human sa kwentada hapit katunga sa kwarta ang nahanaw.
Duna hinuoy konswelo kay posibling mailhan ra ang mga namunit og mikawat sa kwarta tungod kay dunay CCTV sa dapit nahitaboan. Gawad niini duna say daghang mga nakakuha og video, lakip na sa security guard nga si Dean Cuino.
Ang gwardiya maoy dali nga mirespondi og nitabang sa kolektor aron kapugngan ang pagdagsa sa mga tawo ug mabadlong ang mga namunit sa kwarta nga ibulsa ang dili ila.
Apan inay pasidunggan sa bayanihon niyang gibuhat, namiligro kunong mawad-an siya og trabaho.
Mitug-an ang gwardiya ngadto sa mga reporter nga gipadad-an na siya og notisya sa iyang ahensiya nga posibli siyang mataktak sa trabaho tungod sa tulo ka hinungdan. Una, pagbiya sa iyang pwesto nga nahimutang mga 15 metros gikan sa nahitaboan. Ikaduha, tungod sa paggamit sa ilang radyo dihang nangayo siya og tabang. Ug ikatulo, tungod sa iyang pagkuha og video sa insidente.
Nakasabot ko nga di gyud angayang biyaan sa gwardiya ang iyang puwesto. Apan emergency ang sitwasyon ug alang nako angayang malipay ang ahensiya sa gihimo sa ilang gwardiya nga pagtabang. Inay silotan angayan pa gani siya nga gantihan tungod sa dalaygon niyang gihimo.
Kun wala pa si Cuino posibling nahurot gyud ang nagpasad nga kwarta og hakot sa mga kawatan nga midagsa.
Kagahapon, usa ka adlaw human sa hitabo, dunay pipila ka mga tawo nga miuli sa kwartang ilang napunitan. Daghan ang midayeg nila diha sa social media kay kuno buotan ug dalaygon ang binuhatan. Apan pasayloa nga alang nako kining mga niuli usa ka adlaw human sa hitabo angayang dakpon ug pasakaan og kasong pagpangawat.
Dili matuis ang kamatuoran nga human na nila kini gikawat ug nga di mapapas ang krimin nga ilang gibuhat bisan pa og giuli kunohay ang kwarta.
Hayan nabalaka sila nga mapasakaan og kaso tungod kay daghan ang nakakuha og video sa hitabo ug siguradong mailhan sila sa di madugay.
Kun tinuod silang nagpakabana angayang diha-diha ilang giuli ang kwarta ngadto sa naghilak ug nagpakiluoy nga kolektor.
Gawas pa unsay garantiya nga ang kantidad nga ilang giuli mao ra gyuy ilang gikuha? Wa ni silay kalainan sa kawatan nga nagtakuban.