Pailob

Dunay batan-on nga gidala ngari nako kay lagi wala siya sa iyang maayong panimuot. Pintas kini ug dunay dakong kalagot sa usa ka tawo nga iyang ginganlan. Daghan na siya og gisulti. Nagpunay siya og singgit og bastos kaayo og baba. Usahay mangluwa pa. Lud-an ka pa.

Sa akong bahin, gibatonan ko lang gyud ang pailob. Dili maayo nga pasulabihon nato ang atong kalagot ug kapikal kay kini mao man ang mamahimong babag sa atong gipangandoy nga kaayohan. Amenado ako nga daghan pa kong angayang kat-onan kalabot niini. Dugang pagtuon ug dugang pagpailob.

Sa Ministry of Healing and Deliverance mahinungdanon kaayo ang Inner Healing. Ang kasuko ngadto sa mga tawo nga giisip natong mahinungdanon kun significant mao man ang nakadugang sa kalisud sa atong kaayohan.

Dunay mga higayon nga kita feeling abandoned. Dunay mga higayon nga alang nato nahimong daw malisud ang pagpasaylo labina kun lawom ra kaayo ang samad alang kanato. Kasagaran niini nahitabo gumikan sa maluibong kasinatian.

Gibati ko ang tumang kaluoy sa maong batan-on. Dulot sa bukog ang iyang kalagot ug wala ko igsapayan ang iyang pagluwa Kanako. Nagpunay siya og singgit kun nganong dili maantigong mosabot ang iyang pamilya sa iyang kahimtang?

Ug nganong giugbokan siya og itom nga kandila siya ug ang iyang hinigugma. Dugang mga pag-ampo ang gikinahanglan alang niya ug sa iyang pamilya. Unta mamahimo siyang maayo gikan ning maong kahimtang.