Dear Atty. Divine,
Ang balay sa akong igsuon iyang gipaabangan sa iya ra sab nga amiga. Pagsugod maayo pa kaayo siya mobayad og on time gyud. Apan sugod adtong Enero wa na man siya mobayad hangtud karon.
Nagsige nalang siya og saad ug ang akong sister midesisyon nalang nga papahawaon siya tungod sa kadako na sa iyang bayranan. Plano karon sa akong sister nga iya nalang paabangan sa lain. Wala silay gipirmahan nga Contract of Lease. Ang akong pangutana, unsay una namong buhaton aron siya among mapapahawa? Daghang salamat.
Linda
* * *
Dear Linda,
Ang una ninyong buhaton mao ang pagpadala og demand letter sa nag-abang labot sa iyang bayranan ug inyo siyang hatagan sud sa 15 ka adlaw sa pagbayad or else inyo siyang papahawaon. Kun mapakyas gihapon siya sa pagbayad, magpadala mo niya og final demand letter ug inyo siyang pahibaw-on nga kinahanglan na niyang i-vacate ang property. Kun di gihapon siya mopahawa ug di sad mobayad, inyo siyang ipatawag sa barangay.
Kun di gihapon siya mo settle sa barangay then modangop na gyud mo sa korte. Inyo siyang pasakaan og kasong ejectment aron ang korte na ang momando kaniya sa pagpapahawa. Kun di siya moboluntaryo sa pag-vacate bisan kun naa nay court Order, ang sheriff na ang mohimo og aksyon aron sa pagpapahawa kaniya. Thank you and God bless.
Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.