Diha sa atong kaluya

Magkaluya gyud kita labina kun paingon na kita sa katigulangon.

Ning maong katigulangon mamahimong limitado ang atong lihok ug mamahimong nahilansang sa karaan ang panlantaw, dili modawat sa kabag-ohan. Hinuon, wala kini magpasabot nga ang tanang kabag-ohan dautan.

Dunay mga kabag-ohan nga angayang dawaton apan dunay mga kabag-ohan nga angayang balibaran. Kay matud pa, normal ra gyud ang kausaban.

Mao nga matag karon ug unya kini ang mga kamatuoran nga angayan natong atubangon.

Matud pa sa mga astrologers nisulod na kita karon sa panahon sa Aquarius.

Humana ang ang Pisces. Ning panahon sa aquarius nahimong daw sama sa tubig ang panghunahuna ug panlantaw sa mga tawo.  Ang tubig matud pa gamhanan kaayo.

Mohimo kini og pag-fit in sulod sa usa ka dapit kinit ungod kay ang tubig mag-agad lamang sa porma diin siya sulod. Sa ato pa, ang tubig flexible.

Tungod sa gitinguhang survival, buot silang sama sa tubig.

Mao nga ning panahona karon, dili na kita makapaabot og bisan unsang absolute ug objective kun maghisgot kita og pagtuo ug moralidad. Ang tanang nahimong relative, ug subjective.

Kining maong kahimtang inanay na nga nahitabo mismo sa panlantaw sa pipila nga mga Katoliko.

Mao nga ang kanhiay taboo nga mga hilisgutan nahimong giablihan alang sa usa ka debate no less than sa atong mga bantugang mga kaobispohan sa kalibutan.

Ug kun ugaling anaa ang pagtugot mamahimong mausab na gyud ang pagtulon-an og balansayon sa atong simbahan.

Duna nay mga babaye nga magmisa, mga LGBT couples nga gibendisyonan sa Simbahan, ang Santos nga Misa ingon man ang mga sakramento mausab aron mamahimong inclusive ug compatible sa ubang liturhiya sa ubang tinuohan.

Mao kini ang pagadulngan natong tanan kun ugaling kini matugotan.