Maayong balita
Ayaw kahadlok. Kini ang pulong sa pagdasig ni Kristo Jesus ngadto sa iyang mga tinun-an. Dugang pa niya nga ang bisan unsa nga gihunghong sa ngitngit kinahanglang isangyaw gyud sa mga atop sa mga balay, nga sa ato pa, kinahanglang mas agresibo gyud ang tinun-an sa pagsangyaw sa maayong balita.
Dugang pa niya, nga mas maayong kahadlokan ang Dios kaysa tawo sanglit ang tawo mahimong makapatay sa atong lawas wala nay laing mahimo pa. Mas kahadlokan ang Dios nga human makalaglag sa lawas mahimong makalaglag usab sa kalag didto sa impiyerno.
Kasinatian
Subo palandungon nga daghan nato karon ang maulaw gani bisan sa pagpanguros. Dunay uban kanato nga magpakahilom lamang ilabina sa mga panahon nga bugalbugalan ang atong tinuohan. Ang nakapait kay moapil pud kita og bugal bugal. Gani, nahimong sentro pud sa pagbugal bugal ang mga tawong konsagrado. Daw tungason alang nato ang pagpadayag sa atong pagtuo diha sa publiko. Buot lamang kitang mobansay niini diha sa kahilom ug sa kahilit. Ang uban nato bisan gani ang anaa sa mga kadagkoan sa simbahan ang dili buot makapasakit sa pagbati sa mga tawo nga anaa sa ubang denominasyon ug tinuhoan. Sa ngalan sa dialogue atong gisakripisyo dili lang ang orthodoxy kondili hasta usab ang kabilin ug bahandi sa atong simbahan.
Lihok
Tinuod nga kinahanglang atong paminawon ang ubang mga sakop sa laing tinuhoan ug tahuron ang ilang baruganan apan wala kini magpasabot nga atong tugotan sila nga moyubit kanato tungod ug alang sa maong kawsa. Katoliko kita ug ang balansayong Katoliko dili mahimong ipanghagad kanila nga wala motuo niini, ang atong buhat atong pasultihon nga kita sa tinud-anay gyud, mga proud Catholic gyud! Garbo nato nga angkunon si Kristo Jesus atubangan sa kadaghanan bisan pa man kun kini nagkahulogan og pagsupak. Kay mag-unsa man kun uyonan kita sa kadaghanan ning kalibutan apan ilimod kita ni Kristo didto sa iyang gingharian.
Pangamuyo
Ampoon nato ang Credo sa mga Apostoles