Unsa man g’yud ang sakto nga hand posture sa pagkanta o pag recite sa Amahan Namo o The Lord’s Prayer atol sa Santos nga Misa? Kini nga pangutana sa mga magtutuo nga Katoliko kay mora’g nag-iyahay naman lang gud ang porma sa mga kamot sa sulod sa simbahan.
Adunay nagbuka ang duha ka mga kamot, naay nag-akob ang duha ka palad, ug anaa usay naggunitay sa mga kamot nga higpit nga gidili kaniadtong panahon sa pandemic. Dinhi nato mahunahuna ba kong unsa ka luag ang pagsunod sa mga magtutuo kay mismo sa lagsa sa sulod sa simbahan dili man makapareho.
Ang Diocese sa Dumaguete nipagawas og kamandoan sa mga tawo nga mosimba nga kinahanglan sundon ang hand posture atol sa pagkanta sa Amahan Namo aron wala nay kalibog pa nga motumaw. Kini mao ang pag-akob sa duha ka palad o kamot samtang ang pari lang ang mobuka sa kamot o hand posture atol sa Our Father o The Lord’s Prayer.
Base sa naasoy’ng lagda wala na ang magkuptanay sa mga kamot ug ang mga manimba usab kuptan nalang ang kaugalingon mga palad aron mag akub ug dili na mokupot sa ubang mga kamot.
Ang ubang mga pangulo sa Simbahang Katoliko nirespeto sa gihimong lakang sa Dumaguete Archdiocese diin gipadayag ni Cebu Archbishop Jose Palma nga adunay gahum ang mga lider sa simbahan sa paghimo og lagda nga sundon sa mga magtutuo.
Maayo kini ang gihimo sa Dumaguete aron magkahiusa ang tanan sa porma sa mga kamot atol sa ilang pagtambong sa misa, at least nahatagan na og katin-awan ang tanan.
Samtang dinhi sa Sugbo gitug-an ni Archbishop Jose Palma nga magpaabot pa sila sa hiniusang desisyon sa mga naglangkob sa Cebu Catholic Bishops Conference of the Philippines kon CBCP sa sakto ug haum nga hand posture nga maoy ipatuman.
Ang porma sa mga kamot atol sa pag ampo sa Amahan Namo nagsimbolo sa kinasingkasing nga paghimaya ngadto sa Ginoo. Apan dili kini angayan himoong sukdanan sa ka sinsero sa pagsampit nato sa Labaw nga Makagagahum.
Bisan unsa pay porma nato sa atong kamot kong taphaw ang atong pagtuo ug for attendance purposes lang ang pagsimba wala gihapon kiniy kaposlanan, ug samang higayon bisan og wala ka mosabay sa gipatuman nga lagda kong hinukad sa galamhan ang pagpasalamat sa Ginoo, mas sinsero kini.
Apan sa kinatibuk-an, kong adunay official nga mando gikan sa kadagkoan sa atong simbahan, walay rason nga ato kining supakon kay ang pagsunod nato sa mga lider sa simbahan mao pud kana ang pagsunod nato sa atong Ginoo.