Trabaho ug krisis

Laing usa ka libo kapin ka mga empleyado sa Mactan Export Processing Zone (MEPZ) ang nawagtangan og trabaho human ang lima ka mga kompanya nanangtang og mga empkeyado tungod kay naapiktohan sa krisis.

Sa lima ka kompanya nga nanaktak og trabahante ang duha niini nanirado gayod sa ilang operasyon.

Ang maong mga empleyado ikaduha kining hugna (kun wala ko masayop) sa mga empleyado nga nawagtangan og trabaho. Ang unang hugna liboan usab ka mga trabahanti ang nawagtangan og trabaho.

Ang mga nawagtangan og trabaho gihatagan og ayuda sa Departamento sa Pamuo ubos sa Assistance to Individuals in Crisis Situation (AICS) ug ang PESO sa dakbayan sa Lapu-lapu  mipahigayon usab og Job Fair diin gibida ang upat ka libo ka mga bakanting trabaho.

Sa wala pa manangtang og trabahanti ang MEPZ gipahibawo sa Philippine Statistics Authority (PSA) nga miubos ang gidaghanon sa mga walay trabaho.

Ang pagtangtang og mga trabahante dili sayon sa mga kompanya tungod kay nagkonsiderar usab kini sa tiyan sa mga empleyado nga makulban og kaldero ug posibling magutman.

Ang pagtangtang sa mga empleyado mao kini ang katapusan nga baraha sa mga kompanya nga idiga aron lang magpabilin kining makasugakod ug makabarog sa krisis nga giatubang.

Ang pagtang-tang sa mga trabahanti aron makasugakod ug makabarog ang kompanya sa krisis mas maayo na lamang kini kay sa pagpanira sa kompanya.

Sa dili pagpanira sa kompanya bisan sa krisis nga nasinati aduna pa gihapon nahabilin nga mga trabahante nga wala makulbi sa ilang kaldero ug posibling dili magutman.

Dili pod sayon sa mga empleyado nga mawagtangan og trabaho tungod kay mao kini ang ilang panginabuhian. Gani ang Korte Suprema sa taas nga linya sa mga hukom niini nga naglambigit sa pangempleyo mikonsiderar sa trabaho nga usa ka propriedad ug kay propriedad dili kini basta-basta nga kuhaon gikan sa trabahante nga walay pag obserbar sa due process. Ingon ani ka mahinugdanon ang trabaho ug pagpangempleyo.