Editoryal — Turismo sa West Philippine Sea, pwede

Usa ka maayong lakang ang gihimo sa Pilipinas nga giablihan ang turismo sa West Philippine Sea. Kini bisan pa man sa tension nga naa karon sa lugar tungod sa pugsanong pag-angkon sa China nga ilaha ang maong teritoryo.

Dili palang dugay, gilusad sa tourism office sa  lungsod sa Kalayaan Group of Island ang Great Kalayaan Expedition. Pito kini ka adlaw nga tour sa nagkalain-laing lugar sa KIG sama sa mga gagmay’ng isla sa Lawak, Patag, Pag-asa, Ulugan Bay isan Puerto Princesa City.

Medyo mahal kini kay P85 mil kada tawo, apan maayo kini tungod kay kun baratohon kini modagsa ang mga tawo sa lugar ug masobrahan unya og kamalmal ang lugar. Sa pagkakaron, kadto rang mga tubig-tubigan maoy makaadto didto.

Ang ekspedisyon gipuhonanan sa mga residente sa KIG nga naghugpong pinaagi sa pagtukod og kooperatiba nga Kalayaan Islands Tourism Agents Cooperative (KITA Coop).

Ang gibuhat sa KITA pagpalig-on kini sa claim sa Pilipinas sa lugar bisan pa man sa higanteng silingan nga miinsister nga ilaha ang dapit bisag layo kaayo kini sa ilang nasud. Usa sa rekisitos aron ang usa ka lugar nga iya sa usa ka nasud pinaagi sa pagpuyo mismo sa lugar ug dunay sistema sa gobiyerno nga gipatuman sama sa balaod, seguridad sa lugar hasta ang turismo.

Ang maong lakang dili malilong sa mga mata sa China, angay ug matarong gyud nga ipakita ug ipasigarbo kini sa mga Pilipino ug di kinahanglang taguon isip maoy nanagiya ug dunay katungod sa maong teritoryo.

Makapaabot gyud hinuon ang Pilipinas nga dunay buhaton ang China aron pugngan o babagan o ba kaha palabwan ang mga sama niini nga aktibidades.

Duna na silay pito ka mga artipisyal nga islang gipangtukod nga nakompleto nila tanan sa panahon sa administrasyong Duterte, mahimo nila kining himuong tourist destination para sa ilang lokal nga turismo ug tingali gikan sa ubang mga nasud nga nisuporta sa ilang agresibong pagpangangkon sa teritoryong dili ilaha.

Hinuon mas maayo na kini kun itandi sa aktwal nga giyera ug sinukliay og bala. Pinaagi sa turismo man gud, mas maprotektahan ang kadagatan gikan sa pagpangabuso kay gusto man sa tanan nga mapreserbar kini.