Kita ang tahi

Gipasusi ni Cebu City Mayor Michael Rama ang kasayuran nga gihimong boarding house ang karaang barangay hall sa Kamagayan.

Ang kapolisan sa dakbayan nga maoy gitahasan paghimo sa imbistigasyon mihimo dayon og kinalit nga pagsusi.

Naabtan sa kapolisan ang tanod nga nagbantay sa karaan nga barangay hall ug unom ka mga tawo nga nagpuyo didto.

Apan sigun ni Col. Ireneo Dalogdog, hepe sa Cebu City Police Office, di tinuod ang report nga gipaabangan ang barangay hall.

Wala kuno mag-abang ang mga nagpuyo didto tungod kay libre ra ang ilang pag-okupar sa maong dapit.

Gisagop sila ni Kamagayan barangay captain Raquel Avila gikan sa illegal nga V-hire terminal nga gipasirad-an sa dakbayan.

Mga kanhi tag-iya kuno sila og stalls apan wa nay kapaingnan hinungdan nga gipapuyo sila nga libre diha sa karaang barangay hall ubos sa kondisyon nga sila maoy mag-atiman niini.

Dili husto ang gihimo sa kapitan nga paggamit sa karaang barangay hall isip puy-anan bisan pa og tugotan ta nga tinuod nga wala sila paabanga.

Istrikto ang  lagda sa paggamit sa mga butang nga iya sa gobyerno.

Ayaw ko ingna og dili mogamit og tubig ug kuryente ang unom ka mga tawo nga gipapuyo sa kapitan? Kinsa may mobayad sa ilang konsumo?

Gawas pa, nganong di man mga kawani sa barangay ang palimpiyohon sa kapitan.

Nganong laing tawo nga di konektado sa barangay ang iyang gibinlan sa karaang barangay hall? Ug unom gyud ka buok?

Kun nisaler sa kapolisan ang ilang lansis, ang publiko di  mailad niini.

Kun si anhing gobernador Pablo Garcia pa ang pasultion, “dili maayo pagkadispuga, nakita ang tahi.”