Mga mayukmok ray gidaginot

Ang maayong balita gikan ni Bureau of Internal Revenue (BIR) Commissioner Romeo Lumagui Jr. mao nga nakasilot na sila og 28 ka kawani sukad sa niaging tuig, 26 ang gitaktak sa serbisyo ug duha ang gisuspenso. Matud ni Lumagui mao ni pruyba nga seryuso ang iyang kampanya paglimpiyo sa BIR.

Ang di maayong balita mao nga wa niya nganli ang 28 ka kawani ug wa isulti unsay ilang mga ranggo, diin sila nadestino, unsay indibiduwal nila nga kalapasan ug ang mga sirkumstansiya sa pagpasaka og mga kaso, pag-imbestigar ug pagsilot nila.

* * *

Ang pahibawo ni Lumagui way kalainan sa mga paukyab ni kanhi Presidente Rodrigo Duterte. Sa mga higayon nga nisibaw ang mga pasangil sa pangurakot sa iyang mga tinudlo, nipahibawo siya nga may opisyal siyang gitaktak sa way paghisgot og mga ngan ug sa ilang mga atraso.

Maong gawas sa mga huhungihong way paagi sa pagsusi unsa katinuod ang ilang mga pangangkon. Ambot nisunod ba si Lumagui sa binuang nga argumento ni Duterte: Nga igo nang silot ang pagtaktak nila sa puwesto; kay kon kasohan pa, mauwawan ang ilang pamilya.

* * *

Mas hanap ang listahan nga gipagawas ni Lumagui sa kalapasan sa mga kawani sa BIR nga iyang gitaktak: grave misconduct, serious dishonesty, unauthorized absences, falsification of official documents, gross neglect of duty, insubordination ug absence without official leave.

Wa siya magtagad sa paghisgot pila ang kuwarta nga kolektahunon sa BIR nga natabla, pila ang kuwarta sa gobyerno nga ilang nakawat, pila ang kuwarta nga nabawi sa BIR gikan nila ug kon duna bay mga kasong kriminal nga napasaka.

* * *

Tuohan lang sa katawhan ang pag-insistir ni Lumagui nga seryuso siya sa pagtarung sa pagpangolekta og buhis kon makaangkon na siya og kaisog sa pagpaningil sa labing dako nga utangan og buhis sa gobiyerno: Ang pamilya ni Presidente Ferdinand Marcos Jr. nga, base sa demand letter sa BIR niadtong Disyembre 2021, wa pang kabayad sa P203.8 bilyones nga estate tax.

Di hinuon mabasol si Lumagui nga nanaginot og mga mayukmok. Kay dihang nipahibawo ang iyang gipulihan nga si kanhi BIR Commissionar Lilia Guillermo nga mangolekta sa utang sa mga Marcos, gipalagpot siya sa puwesto.

* * *

[email protected]