EDITORIAL - ASF magpabiling hulga

Makaginhawa na og gamay ang mga namuhi og baboy dinhi sa Sugbu niining pag-abli balik sa mga utlanan, pantalan ug pwerto sa probinsya sa Sugbu alang sa mga mamaligya og baboy dinhi ug ngadto sa gawas sa Sugbu.

Gawas nga mabulahan ang mga nagnegosyo niini, mabulahan sab ang mga konsumidor tungod kay dili na unya magnihit ang suplay sa baboy. Usa pa, daghang maguuma nga nagsalig sa backyard piggery ang mabuhi pag-usab.

Kinahanglan lang gyud nga seryusohon ang pagbantay sama sa paghimo og test sa mga baboy nga ipasulod ug ipagawas sa probinsiya aron masigurang luwas kining tanan sa African Swine Flu.

Hinuon, bisan paman gani adtong nagsirado ang Sugbu, makadiyot rang naapektahan ang supply sa baboy. Nagnihit kini tungod kay bisan ang mga namuhi o nangangkat og baboy nabalakang basin maalkanse lang sila tungod sa kawalay kasigurohan.

Nakatabang sab og dako ang pagpanguna sa mga lokal nga lider pinangunahan mismo ni Gob. Gwendolyn Garcia nga ipakitang luwas kan-on ang baboy sa Sugbu.

Kahinumdoman nga naukay ang hog industry sa Sugbu nunot sa pagkadiskubre sa ASF diha sa siyudad sa Carcar pipila ka buwan na ang nakalabay, paspas sab kaayong nakapagawas og mga protocols ang Kapitolyo sa tinguhang masanta ang pagkuyanap niini sa uban pang mga baboyan.

Gihimo sab dayon sa Department of Agriculture ug Bureau of Animal Industry ang ilang mandato base sa ilang naandang pamaagi pagkontrolar sa ASF pinaagi sa culling o pagpatay sa mga baboy nga natakboyan ug sa tanang baboy 500 metros palibot gikan sa tangkal nga naapektahan..

Apan wala kini mauyoni sa gobernadora tungod kay para kaniya duna pay mas epektibong pamaagi. 

Wala sab makauyon ang Kapitolyo sa gihulagway nilang pagpanapaw sa gahum sa BAI nga direkta rang naghimo sa ilang culling operations nga walay koordinasyon sa mga lokal nga kagamhanan ug miabot pa sa puntong magkinihaay na.

Ang labing maayong buhaton karon, mao ang kooperasyon sa tanang LGUs ug sa Kapitolyo uban sa mga ahensiya sa gobiyerno pagpangita og laing pamaagi pagpakgang sa ASF ng di kinahanglang dunay maalkanse o masilo kay kining maong virus magbalik-balik ra gihapon.