Kadakong pangwarta

Alang sa mga senior citizens nga nagsige’g pangutana kon kanus-a sila hatagan og laing financial assistance sa Cebu City government, pahibaw-on ko kamo nga ang pagpanghatag himoon karong Hunyo 15 ngadto sa Hunyo 28.

Matud ni Sir Vicente Esmeña, ang nagsuperbisar sa kalihokan sa Office of Senior Citizens Affairs (OSCA), maoy mitug-an nga karong Hunyo 15 na mahatag kay naapike ang pag-andam sa payroll sa kapin 94,000 ka senior citizens.

Tinguha unta sa OSCA nga ang tag P3,000 nga financial assistance para sa mga senior citizens sa buwan sa Abril, Mayo ug Hunyo, mahatag karong Hunyo 10, apan dili nila mahuman.

Way problema tungod kay wa pa man molapas ang Hunyo ug ang buwan sa Hunyo apilon man sa paghatag. Maayo gani kay ang mga senior citizens dinhi sa Cebu City gigahinan og tag P12,000 nga cash assistance kada tuig.

Sa ubang dapit, ang kagamhanan nila sa siyudad ug lungsod wa gyud motagana og pundo para niini. Dunay gipanghatagan og tag P500 ang buwan, apan ang kwarta gikan man kini sa national government nga gipaagi sa DSWD.

* * *

Pero unsa ning akong nakuhang kasayuran nga dunay mga nagdumala kaniadto sa OSCA nga gireklamo sa usa ka kawani sa Cebu City Hall kay matud pa gituohan nga mibulsa sa minilyon nga kawarta para unta sa mga senior citizens.

Awhagon nako ang mga namasangil nga duolon ko nila aron nga matabangan nato nga mopaspas ang paghimo sa imbestigasyon.

Nakakita ko sa kopya sa formal complaint nga gisang-at sa Complaints and Investigation Section sa City Hall apan ambot kon unsa nay kalamboan sa maong reklamo.

Awhagon nato ang mga kawani sa complaints and investigation section nga dalion nila ang paghimo og fact-finding investigation sa maong reklamo.

Ang pasangil mao nga dunay mga kawani nga mibulsa sa minilyon ka pesos nga kwarta nga alang sa mga senior citizens apan wa makubra kay wa makuha sa mga hingtungdang senior.

Kon dunay ebidensya nga magmatuod nga posibleng nakabulsa gyud og kwarta sa kagamhanan ang mga gipasanginlan, angay sila nga pasakaan og kaso, apan kon way basehanan ang reklamo, angay kini nga i-dismiss.

Dili makiangayon nga ang mga gipasanginlan magpabilin nga katahapan nga tinuod nga sila nangwarta. Bisan og wa kini mabalita sa mga sakop sa media, apan dunay pipila ka kawani sa OSCA nga nasayod niini.

Sayonan ka nga kapin kuno sa 100 ka pahina ang mga ngalan sa mga senior citizens nga wa makakubra unya nabulsa ra ang kwarta. Angay kini nga paspasan pag-imbestigar.