Ang duha ka skywalk nga anaa mahimutang sa Osmeña Boulevard gub-on kay maapektohan man sa pagamugnaon nga BRT Project sa kagamhanan.
Anugon gyud unta kay ang matag skywalk gigastohan ni sa kagamhanan kaniadto og kapin sa P4 milyones, apan gitan-aw man sa atong mga opisyal nga mahinungdanon ang BRT.
Hinuon, natan-aw nako nga wa sab gyud kaayo kapahimusli 100 percent ang maong skywalk kay daghan ang molabang lang gihapon deritso sa karsada.
Gani, usahay makit-an nato nga ang skywalk gihimo lang katulganan sa mga libudsuroy, ug mga makililimos. Apan sugyot nako nga inigguba, dili lang nila kupog-kupogon ang skywalk.
Pwede ra kana alsahon ang mga semento gamit ang crane, kay magamit ra na nga ipabarug sa laing mga dapit nga angay’ng butangan og skywalk.
* * *
Ang nahitabo nga krimen didto sa Tabuelan diin ang asawa gipatay sa iyang bana tungod lang sa pagduda nga may lain kining “kulokadidang,” angay’ng kuhaan og pagtulon-an sa mga magtiayon.
Dili lang kaayo magpalabi og pangabugho, ngadto sa asawa, o kaha bana. Sakit gyud hinuon kaayo kon limbongan ka sa imong asawa, apan kon bakyawon nimo ang imong mga kamot, basin og magmahay ra gihapon ka.
Akong tambag nga sakit man nga masayran nimo nga ang imong asawa nangita’g lain, apan timan-i ang panultihon nga “Kon matuod ka nga nagmahal, ihatag sa imong gimahal unsay iyang ikalipay.”
Daghang babaye diha, pangita’g lain nga ikapuli niya. Ayaw’g pugsa kon dili na siya gusto nimo. Apan hinuktuki ang rason nganong nakahimo siya pagbudhi kanimo.
Kadtong lalaki nga mipatay sa iyang asawa sa Tabuelan, nagpakamatay sab pinaagi sa pagkatkat sa selda nga giprisohan kaniya ug miambak nga giuna ang iyang ulo... aw, patay!
Bitaw, gitugot sa atong balaod nga kon masakpan nimo ang imong asawa nga makighilawas sa laing lalaki, mahimo mo silang patyon nga dili ka mapriso’g dugay.
Destiero ra ang isilot kanimo sa hukmanan base sa Article 247 sa Revised Penal Code (Death or Physical Injuries under Exceptional Circumstances).
Ang hukmanan momando ra nimo nga dili ka paestahon, dili ka pasudlon sa dapit nga nahitaboan, o duol sa nahitaboan sa krimen, sulod sa termino nga imando sa huwes.
Apan bisan og anaa ang maong balaod, motambag gihapon ko nga likayi lang gyud, mentras mapugngan pa nimo ang kasuko kay mabuling-bulingan ra unya ang imong mga kamot.
Sigurado ko nga ang asawa nga mobiya sa bana, magmahay ra unya kon moabot ang higayon nga dagmalan siya sa lalaki nga iyang ipuli kaninyo.
Di ba dunay panultihon nga “Usahay ang kabililhon sa usa ka butang, anha mo ra masayri kon kini layo na sa imong mga bukton.”