Pagkanindot kun matinuod ang tinguhang paninduton og maayo ang Cebu City sama sa Singapore ug sa ubang mga hamugaway nga mga lugar sa kalibutan.
Usa sa gitinguhang paninduton ang coastal barangays sa habagatan o sa south district gikan sa Barangay Sawang-Calero padung sa Inayawan sa utlanan sa Talisay City.
Kining maong mga barangay dunay baybayon kaniadto nga nagatubang sa Mactan Channel, apan gumikan paghimo sa South Road Properties nababoy ang ilang kabaybayonan.
Apan wala gyud hinuon sila hingpit gisirad-an, naa gihapon silay access padung sa kadagatan agi sa gibilin nga gamay’ng lutsanan sa tubig sa dagat nga nagsilbing agianan sa mga mananagat.
Karon, gusto ni Konsehal Jocelyn Pesquera nga paninduton kining maong mga nahibiling agianan sa tubig aron butangan og boat cruising attraction para sa mga turista.
Dako kaayo kining ginbuhaton, una sa tanan dako kaayo ang problema diha mismo sa mga bukana sa mga kasapaan nga nagkonektar aning maong mga waterways tungod sa lapok, basura ug baho nga tubig kay walay kaugalingong water treatment ang siyudad.
Apan kini pisikal lamang nga problema, mahimo kining masolusyonan pinaagi sa pagpalawom, paghabwa sa lapok ug mga basura ug kung duna gyuy pundo, magtukod og water treatment facility aron nga ang mga hugaw nga tubig gikan sa mga kanal ug sa kabalayan malimpyohan una pa ipaawas balik sa sapa padung sa dagat.
Nagpasabot kini og bilyones nga kwarta sa siyudad. Gawas pa niana, ang pagpasunod sa tawo sa mga ordinansa pagprotihir sa kalikopan ug ang aktwal nga enforcement niini ug pagpahamtang og multa niadtong dili mosunod.
Gawas pa niini, kinahanglan sab paninduton sa coastal barangays ang ilang baybayon o waterfront aron ganahan ug maengganyo pud ang mga tawo mag boat cruising sa ilang dapit.
Pulos kining tanan lisod buhaton apan dili imposible. Basta andam mogahin og pundo ang siyudad para niini molampos kini.