Hinay-hinay ng nabatyagan ang kahapsay sa kadalanan gawas nalang sa mga panalagsang insidente sa pagpanglabni nga mga natala, apan kun sa disiplina ug kalimpyo duna nay maayong kalamboan sa siyudad sa Sugbu.
Kini human nga hugot ng gipatuman sa siyudad ang mga ordinansa para sa kahapsay, kalimpyo ug kaluwasan sa tanan dili lang sa mga molupyo sa siyudad kondili hasta sa mga dumuduong niini.
Makita diha sa kadalanan ang mga ordinance enforcers o tigpatuman sa mga ordinansa. Nimenus ang mga basura, wala na kaayoy maglabang-labang sa karsada ug wala na sab kaayoy manigarilyo bisan asa.
Nataymingan kausa sa Banat News ang usa ka pamilyahang langyaw diha sa eskina sa dalan N. Bacalso ug Leon Kilat duol sa usa ka dakong mall.
Wala sila molabang kay naabtan sila sa pagsiga sa traffic light nga dili na pwedeng palabangon sa pedestrian lane ang mga tawo.
Apan dihay usa sab ka lalaking nilabang og dali-dali gikan sa pikas ug diretso kining gisugat sa usa sa mga enforcers ug siya gitiketan.
Ang lalaki, tataw kaayo nga padung trabahoan kay nag-backpack nga nigimaw ang gabas gikan niini, igo nalang sa pagngutkot sa ulo samtang nagsige og hangyo sa nisita kaniya.
Gitiketan siya ug gipamulta sa enforcer. Diha sa ilang tupad ang pamilya sa langyaw nga nag-obserbar kanila.
Ang anak nga lalaking langyaw nagpanglingo-lingo, tingali naluoy sa lalaki o ba kaha nahibulong o nakaingon nga mirisi.
Kun ang mga langyaw gani mosunod sa simpleng lagda sa trapiko nato, nganong dili man kini buhaton sa tanan?
Apan ngano man lagi kun ang mga Pilipino manglangyaw sa laing nasud, makamao man laging mosunod sa ilang mga ordinansa bisan wala sila kaayo makasabot ug walay nagbantay nga enforcer?
Disiplina ra gyud sa matag usa ang yawe sa kahapsay sa lugar, simpleng pagsunod sa mga ordinansa, may nagbantay man o wala, makapahapsay gyud sa tanan.
Kaning law enforcers o ordinance enforcers dili tanang oras makabantay, dapat ang mga tawo na mismo maoy motahod sa mga balaod ug ordinansa kun gusto gyud sa mga Sugbuanon nga matuman ang damgo sa mayor nga Singapore-like city ang dakbayan.