Abuso

Nakaingon ko nga daghan gyud sa mga opisyal ug kawani sa kagamhanan nga nagpasagad lang sa ilang katungdanan, hinungdan nga dunay mga public property nga gipanag-iya na sa hakog nga mga tawo.

Kaniadtong Miyerkules, mikuyog ko sa mga opisyal sa Cebu City government nga gipangulohan ni Mayor Michael Rama nga naghimo og “walk through” gikan sa Gorordo Avenue hangtud na sa Archbishop Reyes Avenue sa Barangay Luz.

Sa diha pa mi sa Gorordo Avenue, atbang gyud sa simbahan sa Asilo dela Medalla Milagrosa, nabantayan ni Mayor Rama nga ang gutter sa karsada kaniadto nasakop na sa kabalayan.

Makita man gyud kay kon lantawon nimo sa unahan, dapit sa karsada nga entrada paingon sa Socorro Hospital, lapad pa ang karsada nga kabahin sa Gorordo Avenue, apan sa mao nga dapit naibanan na og mga usa ka metro ug tunga.

Dayon, misugod na sab mi pagsubay sa Archbishop Reyes Avenue ug nakabantay ang mayor nga mianam og kagamay ang karsada habig sa Gorordo. Bisan ako nakabantay nga kaniadto dunay karaang waiting shed sa maong dapit, apan giguba ug ang dapit gisakop na sa gitukod nga building.

Gikwestyon sab ni Mayor Rama si Architect Florante Catalan nga maoy hepe sa Office of the Building Official (OBO) kon ngano nga gamay kaayo ang setback alang sa sidewalk atubangan sa usa ka hotel.

Mihunghong si Architect Catalan nako nga dili kuno kwestyonable kay 1.2 meter man kuno ang sidewalk gikan sa gutter, apan wa kaayo siya makatingog dihang gipahinumdoman nako nga ang Archbishop Reyes Avenue usa ka national road.

Basta national road gani, lapad ang setback sa mga magtukod og building. Aw, makita man nga ang ubang building nga gitukod dihang dapita lapad ang ilang setback.

Unta, dili masayang ang kahago ni Mayor Rama ug sa ubang mga opisyal ug kawani sa Cebu City government nga mikuyog sa mao nga walk through.

Daghang mga dapit ang gipangpintalan sa PROBE Team aron nga mogiya kanila kon asa nga dapit ang angay’ng panggub-on kay ang mga estarktura gitukod sa public property.

Maayo unta og lihokon dayon kini sa mga hingtungdang opisyal ug kawani sa City Hall aron nga dili mausik lang ang kahago sa mayor, ug sa ubang mikuyog sa maong walk through.

Sunod, dapiton nako si Mayor Rama nga anha kami maghimo og “walk through” sa mga karsada diha sa Taboan District aron makita niya ang grabeng pagpangawat sa mga pwesto diha.

Aw, naa pa man kana karon, makita pa nga ang aseras gikural pa sa mga mapahimuslanon sa higayon. Mga tawo nga way kauwaw nga ang butang nga iya sa publiko, gusto nilang angkunon ug himoon kabahin sa ilang property.