Sige’g damgo ni ex

Dear Tito Miguel,

Ako diay si Jarina, taga Moalboal, Cebu. Naa nakoy uyab, siya si Vince ug duha  ka tuig na ang among relasyon. Basin naa kay kaila Tito Miguel nga kahibalo mobasa og damgo. Nahibulong ko Tito Miguel , sige ko og kadamgo sa akong ex-boyfriend nga si  John. Siyempre, wala nakoy feelings niya ug hagbay rako naka-move on niya sukad naabot sa akong kinabuhi ang akong present boyfriend. Wala naman  ko naghunahuna sa akong ex pero nganong damgohon man ko niya permi ? Buot hunahunaon, same nami nga dunay happy nga lovelife. —JARINA

Jarina,

Ang damgo wala’y kalambigitan sa kamatuoran. Gani, ikaw mismo natingala ngano, nga unta human na man mo’g hingpit na nga nalimot sa inyong kagahapon.

Tingali tungod lamang kay sa luyo sa imong hunahuna nagpahipi ang inyong mga memories. Kay ang atong utok mura ni’g sudlanan sa kagahapon. Dunay malimtan sa hangtod, dunay madumduman taud-taud. Apan dili kini dautan, kay wala nimo tuyoa. Busa ayaw kabalaka, wala ka nakasala sa imong uyab karon. Ang sayop kay kun samtang nagsiga imong mga mata mag sige ka’g tugkad ngano madamgohan nimo siya.

Pasagdi lang, kun unya gabii imo na sab madamgohan, siguroha lang nga momata ka sa kamatuoran nga naa na kay laing uyab karon. Kay kun sige ka’g pangutana ngano, samot siya magbalik-balik inig katulog nimo. Madugay mawala ra gihapon na.Kun tinuod pa ang damgo, di na unta angay molihok ang tawo, paabot na lang unsay motukar sa iyang hunahuna samtang natulog siya.

Wala na untay kabus nga nag-antos. Duna sad uban nagtuo bali ang damgo, apan wala man gihapon nahitabo.

Kun nahitabo man, tayming ra na, tsamba o coincidence. Tutok sa reyalidad samtang nagmata ka, dili sa pantasya samtang natulog ka. Ang pagkatulog tingpahuway, dili kay sige ka paminaw’g atiman sa mga panuway. —Tito Miguel

Magpatambag ka? Ipada kang Tito Miguel: 0998-581-5856