Tambaloslos

Wala magustoi ni Bise Presidente Sara ‘Inday’ Z. Duterte-Carpio ang gibuhat ni House Speaker Martin Romualdez nga mao ang pag-demote ni kanhi Presdente ug karon Kongresista Gloria Macapagal Arroyo (PGMA) gikan sa pagka-Senior Deputy Speaker ngadto sa pagka-deputy speaker na lang.

Wala lang ipakita ang iyang indirektang kasuko pinaagi sa pagpayil og irrevocable resignation isip chairperson sa Lakas-Christian Muslim Democrats (Lakas-CMD), kondili, iya pod kining gipahungaw-post sa social media: “Sa imong ambisyon, do not be tambaloslos.”

Gisakitan gayod si Inday sa gibuhat ni Martin. Tiaw bay magkauban baya silang tulo sa nahisgotang Lakas-CMD nga partido: si Martin, presidente; Inday, chairperson ug PGMA, chairperson emeritus.  Partido nga maoy gitugpahan sa BBM-SARA Uniteam, diin dako kaayog natabang si PGMA aron sila maoy modaog sa piniliay.

Unya wala pa gani usa ka tuig ilang panag-uban, milubad na ang bulok ni Martin? Imbes magakadako iyang pagsalig ni PGMA, giunay na hinuon niya kini sa pag-demote?

Nahadlok ba si Martin sa mga huhungihong-sulsol nga kudetahon siya ni PGMA ug pulihan? Dili ba uyoan man siya ni Presidente Bongbong Marcos (PBBM)? Gani, pirme man siyang ikuyog sa matag biyahe niini sa nagkalainlang nasod? Timaan, nga blood is thicker than water. Unya si PBBM maoy nakapahimutang ni Martin sa puwesto. Ug kinsa pa bay laing makatandog niya?

Tinuoray, may mga bad record si PGMA kon bahin na sa kudeta o korapsiyon ang hisgotan. Pero nakapamahayag na siya nga dihang si Martin ang napiling House Speaker nga maoy gusto ni PBBM, hingpit sab nawala ang ambisyon ni PGMA nga makab-ot og balik ang maong kinatas-ang position sa Kongreso. Ug kinsa bay angay tuohan: si PGMA, o ang mga sulsolero?

Ning gibuhat ni Martin, tataw kaayo nga gusto pa siyang makahupot og mas taas nga national position sa kagamhanan. Hinungdan, nga bisag layo pa ang sunod eleksiyon, imbes motutok sa pagpangalagad sa katawhan, nagpaanod na siya sa hugawng dula sa politika. Bahala nag ang iyang gihimo, maisip nga wrong move kay miaksiyon pagguba sa Uniteam nga gipondar nila ni Inday ug PBBM. Busa, dili mabasol kon ang nasakitang Inday mopabuhagay sa nagdahunog niyang emosiyon: “Sa imong ambisiyon, do not be tambaloslos.” Kataw-anan paminawon, apan undanon!