Pila na ka higayon adunay nahitabo nga animal cruelty sa Sugbo apan wala pa may napabilanggo nga tawong responsable sa pagdagmal sa mga hayop.
Niining bag-o lang duha ka mga dagkong kaso sa animal cruelty ang nahitabo sa dakbayan sa Sugbo, ang pagpanghilo sa lima ka mga iro sa usa ka subdivision sa Barangay Guadalupe.
Mayo 12 napalgan sa tag-iya sa gawas sa gate ang mga iro nga nangamatay na samtang sa kilid sa gate napalgan ang kan-on nga gisagulan og blue chemicals nga gituohang hilo nga nakaon sa mga iro.
Hilabihan intawon ka guol ang gibati sa mga tag-iya ilabi na sa duha ka mga senior citizens nga nagbuhi kanila sanglit giisip nila kining mga miyembro na sa pamilya.
Giimbistigahan na sa kapolisan ang panghitabo diin gitan-aw nila kong aduna bay CCTV camera nga makatumbok kinsa ang kriminal sa mga iro.
Samtang sa laing dog cruelty ang nahitabo sa bukirang Barangay Adlaon sa dakbayan sa Sugbo gihapon diin 127 ka mga iro ang giabandonar sa usa ka balay diin pito na ang namatay.
Walay kaon ug walay inom ang mga iro sulod sa balay nga maoy hinungdan sa pagkaniwang ug pagkabuang na seguro sa ubang iro kay nag kinan-anay na kini aron lang maka-survive.
Gi-rescue sa mga personnel sa DVMF ug CCDRRMO ang mga iro ug gipahiluna sa city pound. Wala na mopatim-aw ang giingong tag-iya sa balay nga gihimong shelter.
Walay kasayoran ang mga barangay official ug bisan ang DVMF sa kalihokan sa tag-iya sa balay diin matud pa mamunit og mga iro nga naglatagaw sa dalan ug sagopon sa iyang balay.
Sa sinugdanan maayo pa man daw ang pagtagad niya sa mga iro hangtud sa nisangpot sa pag- abandonar niini, kong unsa ang rason siya ra gyud ang nasayod.
Nimando si Mayor Mike Rama nga taralon sa hukmanan ang anaa sa likod sa pagpanagmal sa mga hayop kay matud niya unforgivable kini.
Hinaut unta nga mahatagan kini og katumanan aron kapanaminan kini sa mga tawo nga dili na modagmal sa mga hayop.
Ang Animal Welfare Act magpabilin nga walay gamit kong walay madakpan ug masilotan. Kong walay masampolan magpadayon gyud ang pagpangabuso sa kahayopan.