Santo Niño nga sinina dili pang-beauty pageant

Wala mauyoni sa kadaghanan ang gi-post sa social media nga hulagway sa pambatong Sugboanon, Joy Dacoron, alang sa giapilan niyang Bb. Pilipinas beauty pageant. Diin, perpektong kopya gayod sa sinina ni Senior Santo Niño ang iyang gisul-ob para sa national costume competition.

May pipila nga midapig niya. Apan mas daghan ang misaway. Hinuon, mipasabot si Dacoron nga gitugotan siya sa Archdiocese of Cebu sa maong photo shoot. Pero giklaro ni Cebu Auxillary Bishop Ruben Labajo, nga ang pananghid, igo rang himoon ang simbahan nga background ug wala siyay ideya nga iapil pag-promote-feature hasta ang sinina sa Balaang Bata.

Ning maong pamahayag, namora’g Ponsiyo Pilato na hinuon ang bishop. Nanghinaw sa iyang mga kamot aron dili mapiksan sa nanglupad-nagpungasing pagsaway.

Matud pa sa akong anak nga maestra: “Kon ako pa kadtong pari nga gipananghiran ni Dacoron, Tay, dili gyod ko mosugot. Didto sa pagsugod pa lang, ako na silang balibaran. Most Holy na si Santo Niño, atong Ginoo, giampoan nato, unya atong iapil-apil og beauty pageant?”

May punto sab baya akong anak. Dili maayo nga ang sinina sa Milagrosong Bata himoong moda para pang-national costume competition. Angay hinumdoman nga sa pagpili og Bb. Pilipinas, may yugto nga pahuboon tanang kandidata ug mga takip na lamang sa ilang ubos ug ibabaw ang ipabilin.

Unya sila moikid-ikid-mokiaykiay nga mopaso atubangan sa mga mata sa katawhan aron hukman sa mga judges kinsa kanila ang the best in swim suit?

Tipik sa rason nganong sinina ni Sto. Niño ang gipili ni Dacoron, tungod kuno kay sa miaging tuig namatay sa disgrasiya iyang amahan, diin gimahay niya ang Ginoo. Unya mihatag og mga lamdag ang Milagrosong Bata aron mahayagan ang nangitngitan niyang hunahuna. Diin, iyang hisabtan nga matag panghitabo sa atong kinabuhi, may iyaiyang rason.

Busa, agig pasalamat, si Dacoran miingon: “Thus, with pride and deep respect for our heritage, I wear this costume that signifies faith and gratefulness. Viva Pit Senior!”

Nga sa ato pa, pang-Sinulog costume competition diay kining iyang gisul-ob. Ug dili pang-Bb. Pilipinas. Mao nga dili mabasol ang sweet and sour commentaries gikan sa mga Katolikong nagpakabana.

Unta, isipon kining constructive. Nungkang, destructive!