Nagpaka-inahan sa mga latagaw nga iro ug iring

Ang gugma sa usa ka inahan dili lang alang sa mga bata kon dili mamahimo usab kining ihatag siyento porsiyento ngadto sa mga hayop sama sa 93-anyos nga si Ana Garcia . Wala man siyay bahandi apan nangita kini og pamaagi nga makapakaon sa halos tanang mga iro nga libudsuroy nga iyang masugatan sa dakbayan sa Sugbo.

Si Lola Ana, nag-inusara nalang sa kinabuhi kay nangamatay na ang iyang mga igsoon ug wala usab siyay makit-an nga kabanay sa syudad. Apan wala siya mag-inusara kay puno siya sa gugma sa mga iro ug iring nga maoy gihalaran niya sa iyang kasing kasing.

Kong asa lang siya maabtan sa gabii didto usab siya matulog ug mobangon nga walay kasegurohan kong asa siya makakuha og pagkaon. Nabuta na usab ang iyang pikas mata kay wala matabang ang katarata niini.

Sa iyang sitwasyon, angayan na gyud unta nga mopahuway nalang siya kay maglisod naman siya og lakaw kay naa pud siyay sakit sa bukog. Apan wala niya kini baleha basta makapakaon siya sa mga iro ug iring nga giisip niyang iyang mga anak ug mga apo.

Nahimamat nako si Lola Ana sa buhatan sa DVMF kinsang nagbitbit intawon sa iyang iring nga gisulod sa cage aron ipakapon. Bug-at ang iyang dala ug lisod pa kay nagsakay ra man kini og bus aron makaabot sa buhatan sa DVMF.

Nanghangyo siya nga data-datahan niya og tag P20 ang bayad sa pagpakapon sa iring nga nakapatandog sa kasingkasing sa mga taga DVMF labi na sa pangulo niini nga si Dr. Jessica Maribojoc nga nitanyag nga libre ang bisan unsa nga serbisyo ni lola sa iyang mga hayop.

Akong gihatod sa downtown area si lola Ana ug nideritso siya sa Agrivet Supply ug ang kwarta nga gihatag niya gipalit niya tanan og mga dog ug cat food nga nahalon kay matud niya dunay mga iro ug iring nga pilian ug dili mokaon sa mga salin sa restraurant maong iyang palitan og espesyal nga pagkaon, bahala na og wala siyay pagkaon basta maseguro lang ang mga hayop.

Kaduha ka besis siya motuyok sa syudad, mangayo og mga salin nga pagkaon sa mga kan-anan ug iya kining hagpatan kay kadtong mga bukog iyang ilabay kay makadaut kuno sa mga hayop kong makaon, ingon niana niya ka pinangga ang mga giisip niyang mga anak.

Mas natandog ako dihang gipangutana nga unsay iyang gustong mahitabo. Matud niya gusto niyang lugwayan sa Ginoo ang iyang kinabuhi kay mahadlok siya nga wala nay magpakaon sa mga Iro ug Iring sa kadalanan, dayon nitulo ang iyang mga luna.

Dugang ni lola nga angayan nga kabalak-an ang kahimtang sa mga hayop kay dili makabalo moestorya apan kong ang kasingkasing maoy gamiton mopatigbabaw gyud ang gugma.

Angayan lang nga bation nato og Happy Mother’s day si Lola Ana Garcia, iyang giklaro nga single “N” ra ang iyang ngalan nga ANA Garcia.