EDITORYAL - Nganong di kaya sa Pilipinas?

Isip usa ka maritime nation, o nasud nga nalibutan og kadagatan, ang Pilipinas usa gyud unta sa mga nag-unsa sa ship building industry sa kalibutan, apan hangtud karon dili pa kini matawag nga sama niini.

Daghan ang mga nag-ingon kaya sa Pilipinas paghimo og kaugalingong barko, kay duna kini daghang skilled workers, duna kini daghang engineers ug uban pa nga gikinahanglan sa paghimo og barko.

Apan nganong wala man mahitabo nga nahimong ship building nation ang Pilipinas hangtud karon?

Nganong sagad sa mga barko nga gipanggamit sa gobiyerno binuhat man sa abroad? Ang uban moingon nga tungod kay dunay ma-komisyon sa pagpalit og mga barko didto sa gawas, mao lang ba kini ang rason?

Tinuod daghang kapabilidad ang Pilipinas, daghan kini og mga shipyards nga diin makita nga naghimo sila’g mga klase-klase apan pulos tanan gagmay nga barko.

Duna say mga dagko og pangalang ship builders sama sa Tsuneishi ug Austal sa Balamban, Hanjin didto sa Olongapo, ug uban pa.

Sa estorya dili mahubsan ang mga Pilipino, apan sagad wala masayod sa tinud-anay nga sitwasyon sa ship building industry sa nasud.

Dunay mga mapasigarbuhon pang miingon nga kaya sa Pilipinas paghimo og mga barko para sa Philippine Navy, Coastguard, BFAR ug uban pa.

Sayon ra paghimo og barko, basta molutaw ug modagan, pwede na. Apan dili ordinaryong barko ang gigamit sa militar, ang desinyo niini pinatuyo aron dili basta malunod bisan maigo og mga bomba.

Ang kuwang sa Pilipinas mao ang mga naval architects paghimo og mga desinyo sa barko nga makatabok-tabok sa lagpad nga kadagatan samot na kun gamiton sa gubat.

Ikaduha, way puhonan paghimo niini ug pangsweldo sa mga Pilipinong naval architects o designers.

Kun duna may shipyards nga naghimo dinhi og mga ocean-going nga mga barko, dili kana gidesinyo og Pilipino, gidala nalang ang plano dinhi para trabahoon ug pormahon nalang.

Wala say kapabilidad ang mga Pilipino pagdesinyo ug pagbuhat kun unsay ipangsulod aning mga barkoha.

Sa laktod, kaning mga dagkong shipyards nga naa karon sa Pilipinas gipanagiya og mga langyaw nga kompanya.  Maong dinhi sila nag-operate tungod sa baratong sweldo sa mga skilled workers dinhi kun itandi didto sa ilang mga nasud.