EDITORYAL - Pension sa AFP retirees

Usa sa hinungdan sa kalangay sa modernisasyon sa Armed Forces of the Philippines mao ang kakuwang niini sa budget aron ipalit og mga modernong gamit ug mga pasilidad para palambuon ang kasamtangan niining mga kampo.

Apan nasayran nga dakong pahat o 40 porsiyento sa tinuig nga budget sa maong departamento napunta tanan sa pension sa mga retirado sundalo.

Ang 60 porsiyentong nahibilin maoy paiguon para sa sweldo sa mga sundalo, pagpalit og mga armas ug gamit, gastos sa petrolyo sa mga sakyanan niini, gastos sa inadlaw-adlaw nga operasyon ug uban pa.

Dunay mga magbabalaod nga misugyot nga maayong kuhaan ang budget nga gitagana para sa mga retirees aron ang madaginot nga budget magamit sa modernisasyon karon sa AFP.  Kung tan-awon maayo kini nga sugyot. Dako gyud ang pundong ma-divert padung sa modernisasyon kun kini mauyonan sa tanan.

Apan ang maong lakang dili madawat sa mga retirado na ug kadtong padung pa moretiro. Tungod kay ang kadaghanan kanila anha naman magsalig sa ilang inadlaw-adlaw nga panginahanglan tungod kay sila mga edaran naman.

Usa pa, ang mga aktibong sundalo karon dili sab mahimuot niini kay kun moretiro na unya sila, unsa pa man kahay mahibilin nga pension nilang madawat?

Dagko og sweldo, maayo og benepisyo dili lang sa mismong sundalo kondili hasta sa iyang pamilya, libreng medical ug hospitalization sa ilang mga benepisaryo, housing,  dunay combat pay sa airmen ug sailors, ug dagkong pension ini og retirado na sila sa serbisyo ug daghan pang uban nga wala sa mga pribadong trabahante.

Ang propesyon sa pagka sundalo dili lamang halangdon ug bayanihon, sa ekonomikanhong  bahin, usa kini sa labing lig-on ug sinigurong trabaho itandi sa uban.  Mao nga usa kini sa rason nganong  bisan sa peligro ug kalisod makasulod, daghan gihapon ang magpunsisok pag-boluntaryo og sud sa AFP.

Kun wagtangon ang bisan asa ani ilabi na kun pagamyan ang pension, mameligro nga monihit ang gustong mosud sa AFP.  Labaw sa tanan, ang reaksyon unya sa mga retirado ug aktibong mga miyembro sa AFP.

Kinahanglang timbang-timbangon kini og maayo sa mga magbabalaod. Usa na niini kanang mga planong dili gyud kaayo kinahanglan sama anang planong mandatory ROTC nga bilyon-bilyon ka pesos ang budget matag tuig, gikinahanglan ba gyud kaayo ni para sa tanan?