EDITORYAL — Aksidente sa kadalanan malikayan

Nagsagunson na sab ang mga aksidente sa kadalanan sa Sugbu, partikular na diha sa South Road Properties viaduct ug sa ubang bahin sa Metro Cebu nga miresulta sa kamatayon sa mga motorista.

Sa SRP viaduct duha ka nagsunod nga adlaw dunay nahitabong disgrasya nga parehong nisingil sa kinabuhi sa duha ka mga motorcycle riders. Ang ilang mga kontra, mga dagkong trak de karga nga sama kanila mag-agian sab sa maong dalan.

Nabantayan nga diha sa SRP viaduct, walay motorcycle lanes nga maoy subayon sa mga magmotorsiklo, dili parehas sa CCLEX nga duna gyuy gipalahi nga bahin sa dalan nga ekslusibong agianan para sa mga magmotor.

Subay sa road safety, bisan wala pay motorcycle lane dapat nasayod gyud ang mga riders nga ang outer lane para gyud sa mga paspas ug dagkong mga sakyanan sama sa mga trak de karga, samtang ang inner lane para sa mga motor ug mga sakyanang wala magdali.

Apan pagabot diha sa viaduct wala man motuman niini ang mga riders, ang uban anha gyud moagi sa outer lane mosagol ug makig-patentiro sa mga dagkong sakyanan nga paspas kaayo ang dagan, dunay uban nga mo-overtake gyud sa mga nag-una ug gibutang ilang kinabuhi ug ang kinabuhi sa ubang motorista ngdto sa peligro.

Naa pa gyuy kinaiya sa ubang mga drayber sa dagkong trak nga daw manuyo og pakilid sa mga magmotor ug usahay businahan pa ini og duol na sila kaayo nga daw gustong pakuratan ang mga nagmotor.

Ang kinaiyang maldito magmaneho peligro kaayo sa kinabuhi sa ubang motorista. Apan dili ikalimod nga dunay daghan niini dinhi sa Sugbu ilabi na kaning mga magmaneho og dagkong trak nga daw dili magpakabana  sa ubang road users.

Gawas sa mga maldito ug way disiplinang drayber, nakatampo sab aning mga aksidente kaning kakuwang sa mga cautionary signs sa mga dagkong karsada dinhi sa Siyudad sa Sugbu.

Kun duna lang niini nakapaskin nga makita sa tanang mga drayber, duna gyuy magpahinumdom kanila sa ilang responsibilidad isip drayber.

Maayo unta og ang mga hingtungdang ahensiya sa gobiyerno hasta ang lokal nga kagamhanan  magbutang aning mga paskin para sa kaluwasan sa mga motorista.