EDITORYAL - 100 milyones nga Pinoy di kapiog

Kada tuig dili momenus 20 ka mga bagyo ang mosulod sa Pilipinas, ang uban niini pwerte ka kakusog nga nagbilin og bilyon-bilyon ka pesos nga danyos ug daghang kinabuhi ang nakalas.

Samtang nagdagan ang panahon, nabatyagan na sa mga Pilipino ang nagkabangis nga mga katalagman sama sa bagyong Ruping, Bagyong Frank, Bagyong Yolanda ug ang labing uwahi ang Bagyong Odette nga gikonsiderar nga mga super typhoon dili lang tungod sa gikusgon kondili sa gilapdon sa naigo niini sa pagtugpa dinhi sa Pilipinas. Matud pa sa mga eksperto kaning nagkakusog nga mga bagyo epekto na kini sa Climate Change tungod sa global warming.

Kining global warming hinayhinay nga pagsaka sa temperatura sa kalibotan gamay lang kaayo kun ang numero ray tan-awon, apan paigo na aron makagusbat og nasud sama sa Pilipinas nga kinaunahang nasud nga maagian sa mga bagyo gikan sa Pasipiko kada tuig.

Ang Climate Change dili sala sa kasamtangang henerasyon, kondili sala ug binuhatan kini sa mga naunang mga katiguwangan nga wala maglantaw sa umaabot nga panahon. Wala sila mopatuo sa mga senyales sa pagusab sa klima sa kalibotan kay nakatutok ang tanan sa industriyalisasyon ug negosyo. Nag-una niini kani karong mga adunahan ug malambuong mga nasud.

Ang mga gagmay’ng mga nasud sama sa Pilipinas uwahi na kaayo  ug mao pay pagbanat aron makaapas, apan mao sab karon ang una pirmeng maigo sa negatibong epekto sa mga gipangbuhat sa mga adunahang nasud pipila ka dekada na ang milabay sa dihang sila nagpalambo pa sa ilang mga nasud.

Dili makapiog ang kapin 100 ka milyon ka Pilipino pagusab o pagbali sa negatibong epekto sa Climate Change, apan mahimo kining makatabang pinaagi sa paghunong og tampo sa polusyon nga nakapadali niini.

Apan dili kini mabuhat sa mga ordinaryong Pilipino kun dili manguna ang gobiyerno sa paghimo og kritikal nga mga kausaban sa mga polisiya niini pagprotihir sa kalikopan.

Usa na niini ang paghimo na gyud untang 100 porsiyentong renewable energy ang source sa enerhiya sa tanan apil na sa transportasyon.

Kinahanglan lang nga desidido ug pursigido kining buhaton sa gobiyerno aron ang tanang Pilipino mosunod.