Kinahanglang witkan aron makamata ang gobiyerno nga nakatulog og napulo ka tuig sukad nga naimplimentar ang K to 12 law kay sila mismo daw walay salig sa produkto sa maong programa.
Si Senador Sherwin Gatchalian miingon nga ang mismong gobiyerno maoy nagkulang aron mapahimuslan sa mga produkto sa K to 12 ang maong programa.
Ang K to 12 law naglatid sa mga posisyon nga pwedeng masudlan sa mga gradwado sa K to 12 ug ingon man niadtong produkto sa karaang curriculum nga mga high school graduates. Apan nasuta nga naglisod ang maong mga tinun-an nga makasud og trabaho sa gobiyerno tungod sa mga rekisitos nga gipangayo nga wala nila.
Sa pagkatinuod, daghan sab mga gradwado sa kolehiyo ang nakig-ilog sab sa maong mga entry-level position sa mga ahensiya sa gobiyerno, lisud kaayo para sa mga bag-ong gwadwado sa K to 12 nga makaparang sa mga nakahuman og kolehiyo. Ang tumong sa K to 12 nga makatabang sa paglambo sa edukasyon sa mga kabataang Pilipino, nga maandam sila aron makakuha og maayong trabaho sa umaabot nga panahon bisan og dili pa sila dayon makapadayon pagtungha sa kolehiyo.
Ang makahuman og K to 12 sakto na sa edad o legal na ang edad ug duna na gyud untay teknikal nga kamahoan aron magamit sa ilang pagpangempleyo kung di sila mopadayon pagtungha sa kolehiyo.
Apan kun ang mismong gobiyerno nagkulang pagsuporta kanila, unsa nalay mapaabot sa mga tinun-an nga suporta gikan sa mga pribadong kompanya?
Unya ang ubang mga kiatan og hunahuna ug kontra sa K to 12 program, lanog na sab kaayong nanawagan nga ibalik ang kinaraang kurikulum. Wala nila tan-awa nga kun kini ganing sakto na og edad ug duna nay kamahoang teknikal nga mga produkto sa K to 12 naglisod og pangitag trabaho, gusto nilang mobalik sa kinaraan?
Matud pa DepEd, 10 porsiyento sa produkto sa K to 12 lang ang nakatrabaho, ang 83 porsiyento nila nipadayon pagtungha sa kolehiyo. Ang angay niini, kinahanglan ang mismong gobiyerno mopakita og pagsalig sa mga produkto sa K to 12 ug tabangan ang mga produkto sa karaang curriculum nga wala pa gihapon makakaplag og trabaho.
Labaw sa tanan, dili na ibalik ang karaang kurikulum kondili palambuon pa gyud ang K to 12.