EDITORYAL - Ang hagit

Pinasikad sa: Buh. 2;42-47

Kining maong basahon mao man ang sukaranang teksto sa Basic Ecclesial Communities.

Gipahimug-atan dinhi ang pulong sa Dios inubanan sa pagtulon-an sa mga apostoles, ang ilang katilingbanong pagkinabuhi.

Ug ang ilang pag-inambitay mismo sa ilang mga kabtangan aron ang si bisan kinsa adunay magamit segun sa iyang panginahanglan. Mahimo pa ba nato kini  karong  mga panahona?

Ang gihatagan og igong gibug-aton karong mga panahona mao man ang kompetisyon ingon man ang kinaugalingong tinguha aron mamahimong mas molambo pa kaysa uban.

Ang kinabuhi ingon nga kahigayonan sa pagtinabangay nahimo man hinuong kahigayonan sa paglumbaay kun kinsa ang pagailhong kusgan ug gamhanan.

Ning panahon sa Pasko sa Pagkabanhaw atong buhion ang pamaagi diin nagpakabuhi ang unang mga Kristiyanos.

1. Atong amomahon ang atong kaugalingon pinaagi sa pulong sa Dios.

2. Ang paghunahuna sa panginahanglan sa uban makahatag og igong kadasig diha sa paglikay sa pamintaha.

3. Ang pagpaambit sa panalangin kutob sa mahimo dako man matampo aron atong mas masabtan ang buhing kamatuoran nga dili kita maoy tag-iya sa bisan unsa nga atong nahuptan.