Labihan ka-epektibo ang pagpakahilom ni Presidente Ferdinand Marcos Jr. sa kontrobersiya sa nalangay nga importasyon sa asukar sa niaging tuig. Nga wa nay naghisgot (gawas ining column nga imong gibasa) sa bulilyaso sa iyang administrasyon nga nakapasamot sa kanihit sa suplay ug kataas sa presyo.
Nga posibleng maoy nakakumbinser niya sa pagpakahilom na sab sa bag-ong kontrobersiya: Ang pasangil ni Senador Risa Hontiveros nga iyang gitugotan ang importasyon sa 440,000 metric tons nga asukar bisan wa pay sugar order. Nga ubos sa balaod kaluwatan lang sa Sugar Regulatory Administration.
Ang pagtak-om ni Marcos nakatabang niya paglikay sa responsibilidad tungod sa pakigkonsabo sa ubang mga institusyon:
• Ang bulilyaso sa niaging tuig gihan-ok ni Executive Secretary Lucas Bersamin ngadto sa iyang gipulihan nga si kanhi Executive Secretary Victor Rodriguez sa way paghisgot nga may bendisyon sa presidente ang salida; ug
• Ang pasangil sa Malacañang-initiated sugar smuggling karong tuiga wa matarung pagtuki tungod sa pagmika sa Senate Blue Ribbon Committee, paglingiw sa ubang mga opisyal sa administrasyon ug, nakatag-an ka, sa panagana sa mga sakop sa media sa pagpaningil og katin-awan.
* * *
Ang kalamposan sa paglusot pinaagi sa paghilom ni Marcos nanakod na sa ubang mga opisyal sa gobyerno:
• Pabiling nagpakahilom ang lokal nga mga opisyal sa duha ka semana nang expose ni Dr. Alice Utlang, Cebu City Veterinarian, sa pagtago sa unang mga kaso sa African Swine Fever (ASF) sa Sugbo sud sa upat ka buwan; ug
• Padayong tak-om si Heneral Rodolfo Azurin Jr., hepe sa Philippine National Police (PNP), sa pagkaapil sa iyang ngan sa pasangil nga cover-up sa P6.7 bilyones nga shabu nga nasakmit gikan sa opisyal sa PNP Drug Enforcement Group.
* * *
Nisaad si Azurin, tungod sa pagkuti-kuti sa media, sa pagbuak sa iyang kahilom karong adlawa. Di makapa-ugat si Azurin kay iyang labaw, si Secretary Benhur Abalos sa Department of Interior and Local Government (DILG), maoy nagsugod sa pasangil.
Di maikog ang mga politiko sa Sugbo pag-isnab ni Utlang. Kinsa gilabay og laing puwesto tungod sa pamolitika ni Cebu City Mayor Mike Rama. Atong gilaoman nga ang media sa Sugbo maoy magkuti-kuti ining isyuha. Bisan sa risgo nga silay sunod mabanghagan. O ikiha.
* * *