EDITORYAL - Pagbalik sa kinaraan

Dunay gihugonhugonan plano nga ibalik sa kaniadto naandang school calendar ang mga klase sa mga tunghaan nunot sa matud pa peligrong dala sa panahon sa ting-init ngadto sa panglawas sa mga tinun-an.

Ang school calendar sa pagkakaron nagsugod og Agusto nga tapuson sa bulan sa Hunyo. Ang kausaban resulta kini sa pagkaguba sa sistema sa edukasyon atol sa paghugpa sa pandemiya sa Covid-19.

Ang pandemiya maoy nakaingon sa paghunong sa linawas nga pagtungha sa mga bata tungod sa estriktong pagpatuman sa social distancing hinungdan nga gihimo ang modular, distance o online classes aron dili mabiyaan ang edukasyon sa mga kabataang Pilipino.

Tungod sab niini, tanang mga tunghaan mihimo og dakong kausaban sa ilang pamaagi sa pagtudlo, migasto sila og dako sa mga gamit sama sa mga computers ug laptops para sa mga ilang mga magtutudlo ug uban pa.

Apan bisan nakontrolar na ang Covid-19, gipadayon ang sistema sa school calendar apan ning tungora balik na sa linawas nga pagtungha ang mga bata basta tumanon gihapon ang mga dili na kaayo higpit nga health protocols.

Ang rason karon sa mga gustong ibalik sa naandang school calendar ang pagtungha, dili na Covid-19 kondili kining grabeng kainit sa panahon kay matud pa dili makapokus ang mga bata sa pagpaminaw sa ilang mga leksyon tungod sa kaigang.

Apan daghan ang nakauyon sa bag-ong sistema, tungod kay menus kaayo ang mga adlaw nga baha ang kadalanan pagpadung nila sa mga eskuylahan.

Ikaduha sab, nahaum kini sa school calendar sa mga tunghaan didto sa gawas sa nasud alang niadtong nagtinguhang moeskuyla sa gawas.

Gawas pa, kaning problemaha sa kainit sa panahon mapangitaan man kini og solusyon nga di kinahanglang ibalik sa naandan ang sistema.

Mahimong magpatukod og dugang mga lawak-saringan ug butangan og klarong bentilasyon aron dili init. Dili maghimo og mga kalihokan sa mga oras nga grabe ang kainit sa panahon ug daghan pang uban.

Inay magsige usab-usab, mas maayong palambuon nalang ang kung unsay naa karon aron dili na hasol para sa tanan.