Gustong paliton ang yuta nga way titulo

Dear Atty. Divine,

Ang akong sister dunay paliton nga farm nga 2 hectares. Way titulo ang  maong yuta og forest land ang classification niini. Hinuon dunay Tax Declaration og nakapangan kini sa seller. Plano unta sa akong sister nga idevelop ang maong property. Ang akong pangutana kon okay ra ba niya paliton ang maong property bisan kon way titulo? Daghang Salamat. — Shirley

* * *

Dear Shirley,

Tungod kay forest land ang classification sa property dili gyud mapatitulohan ang maong farm nga gustong paliton sa imong sister og dili sab gyud kini niya mamahimong aplayan og titulo. Kon dunay gikuptan nga tax declaration ang seller, mas maayo nga inyong ipangutana daan sa Assessor’s office diin mahimutang ang maong property kon mamahimo bang matransfer ang tax declaration bisan kon forest land ang classification Mas maayo nga inyo sab daan nga iverify  sa DENR kon alienable and disposable ba kining yutaa or else dili ninyo maprocess ang transfer sa tax declaration ngadto sa pangan sa imong sister og masayang ang iyang pagpalit sa property kay di man mabalhin sa iyang name ang tax declaration. Hinuon kon dili ra sab mahal ang pagkabaligya, mamahimo ra man nga paliton niya ang yuta apan dili lang sab siya mogasto og dako sa improvements niini kay di man niya mabaligya ang property kon ang tax declaration magpabilin sa pangan sa original declared owner. Thank you and God bless. — Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado Ug Domingo.