EDITORYAL - Seguridad sa enerhiya

Kada tuig nagkadako ang demand sa enerhiya sa Pilipinas tungod sa nagkadako niini mga pasilidad ug mga industriya nga kinahanglang padaganon gamit ang kuryente.

Apan ang gobiyerno, kampante ra kaayo nga ang mga pribadong power producers ra maoy nangita og paagi aron mahatag ang maong mga demands.

Tungod sab niini kinahanglan nga antoson sa mga konsumidor ang kamahal sa presyo sa enerhiya kay kining mga power generators ug distributors maoy magdiktar sa presyo basta dili lang molapas sa gitakdang price ceiling sa gobiyerno.

Apan asa man gikan kining enerhiya, nagagikan kini sa mga dagkong planta nga nigamit og coal o fossil fuels nga giingong 50 percent nagagikan ang kuryente sa nasud.

Ang nahibiling 50 percent nga na-generate nga kuryente gibahin-bahin sa renewable energy sources sama sa geothermal, solar, hydroelectric power plants, ug sa nihit na kaayong supply sa natural gas. Apan kining mga renewable energy powered plants gipadagan gihapon sa mga pribadong kompanya.

Sila gihapon maoy nagdiktar sa tanan. Sumala pa nga 6.53 percent ang pagtaas sa demand sa enerhiya sa nasud kada tuig tungod sa pagdako sa ekonomiya. Apan ang source sa magpadagan sa mga planta sa enerhiya niini pinalit pa gikan sa gawas sa nasud.

Kun dunay dagkong giyera nga direktang makaapektar sa tinubdan sa coal sa Pilipinas, mameligro ang nasud ug mapiang ang tanang operasyon niini ilabi na ang ekonomiya.

Maayo unta og magbaton og panglantaw sa ugma ang mga magbabalaod ug mangandam samtang wala pa kini mahitabo.  Sa laktod, dili lang ang seguridad sa pagkaon maoy angay tutokan, apilon sab ang seguridad sa enerhiya sa nasud.

Usa sa maayong himuon mao ang pagsuporta sa mga giduso inisyatiba nga makapadugang sa energy supplies sa nasud. Sama sa nuclear, dugang mga renewable energy plants ug uban pa.

Ibasura ang mga balaod nga magpugong sa pagtubo sa energy reserves sa nasud. Dako na kaayo ang matampo para sa ekonomiya ug sa mga kabus ang baratong presyo sa kuryente.

Apan dili kini mahitabo kun nihit ang supply niini o pinugngan ang pagpagawas niini tungod sa mga balaod nga nagbutang og limitasyon.