Taud-taud na nga nadunggan nako ang reklamo sa grupo sa lokal nga mga turista ang ka mahal sa pagkaon nga ilang gikaon sa Virgin Island sa Panglao sa lalawigan sa Bohol.
Nabalik lang sa akong panumdoman ang reklamo sa ka mahal sa pagkaon sa among pagbisita sa Alona, Tawala, Panglao alang sa usa ka opisyal nga lakaw.
Tungod sa ka mahal hapit na lang ko dili mokaon. Ang usa ka cup nga kan-on tag P40 pero gamay ra pod kaayo ang cup, ang usa ka plato nga kan-on P200, ang ilang barbecue nga tag P15 ra sa Cebu tag P70 ang usa. Ang lechon baboy tag P1,200 ang kilo, ang bangus nga gamay P550 ang usa, ang pork belly tag P400 ang usa. Samot na gyod ang prisyo sa ubang klase sa ilang isda.
Pag-adto nako sa Boracay alang sa usa ka opisyal nga lakaw reasonable ra ang prisyo sa ilang mga pagkaon. Ang prisyo sa mga pagkaon sa Panglao mas taas kun imo ikomparar sa prisyo sa mga pagkaon didto sa Boracay.
Ang reklamo sa mga lokal nga turista sa Virgin Island gi-aksiyonan na sa lokal nga kagamhanan sa lungsod sa Panglao. Manghinaut ko nga ang prisyo sa pagkaon sa Alona maaksiyonan pod sa mga opisyal sa Panglao.
Wala bay gahom ang Department of Tourism sa pagkontrolar sa prisyo sa mga baligya nga puwerte gyud ka mahal sa mga dapit nga dugokan sa mga turista?
Dili ikalimod nga ang mga dumoduong o turista lokal man o langyaw magdala gyod og salapi sa ilang paglakaw apan dili pod maayo nga abusohan ang ilang pagbisita sa usa ka lugar.
Mas modaghan og samot mga turista nga mobisita kon reasonable ang prisyo sa mga palaliton.