Dako na gyud kaayo og kausaban ang kabukiran karon diin akong nakita nga anaa na didto ang kalamboan dungan sa pagtuyhakaw sa turismo nga nakatampo og dako sa kinabuhi ug panginabuhi sa katawhan ug labaw sa tanan ang ekonomiya.
Mao kini ang akong nasaksihan sa akong pagtuyok sa mga bukirang barangay niadtong adlaw’ng Sabado diin nagpahigayon ko og random visitation sa mga tourist spots sa Cebu City, kutob sa akong masum-okan nga dapit nga dili pa kaayo ilado.
Aduna diay daghan nga mga man-made paradise nga wala lang kaayo na-promote o kong na-feature man sa kaugalingon lang nilang social media page or sa mga vlogs. Bisan unsa ka suok sa dapit ug challenging kaayo ang agianan aduna man gihapoy mga domestic ug foreign tourist ang motuyo gyud og adto aron ma-experience ang katahom sa dapit nga lahi sa kasamok ug kahugaw sa hangin sa urban area sa metropolis.
Maglinya pa gani ang mga sakyanan nga nagpasabot nga lagsik ang turismo sa mga dapit nga naghatag pud og higayon sa mga lokal nga makapamaligya sa ilang mga produkto.
Usa sa akong naadtoan ang Little Kyoto sa barangay Babag Uno, Cebu City, 35 minutes lang ang biyahe gikan sa sentro sa syudad. Suoton lang ang dalan apan nindot gyud ang dapit nga masinati nimo nga tua gyud ka sa Japan.
Ang nga estraktura gi-pattern sa syudad sa Kyoto sa Japan, ang ilang pagkaon authentic Japanese food, ug ang tibuok dapit napalibutan sa lunhaw nga kabukiran ug mamahimo sad nga magsul-ob og kimono dress diin aduna silay paabangan.
Samtang sa laing barangay sa Sudlon Dos nagpahipi ang bag-ong ugmad nga paraiso ang mountain resort diin malantawan ang natahom nga kabukiran sa Sugbo nga molagbas pa sa silingang lalawigan sa Negros Oriental. Hilabihan ka bugnaw nga mag-fog pa gani, linaw kaayo ang dapit diin ang madungog lang mao ang huyohoy sa hangin ug anaa usab ang mga utanon nga mamahimo ra manguna deretso gikan sa umahan. Mamahimo usab maligo sa infinity pool nga ang background ang bukid ug ang langit, pwede pud mosakay og kabayo.
Gipanag-iya ang 17 ka ektaryang man-made paradise ni Buth Guillen kinsa nipadayag nga nahimugso ang gitawag niyang “Plantaciones” panahon sa pandemic nga naghatag og paglaum sa mga tawo.
Samtang sa Cantipla, Barangay Tabonan, ang strawberry farm nga mamahimong mamupo og bunga dayon kan-on, daplin ra sa karsda. Kong gusto og mas bugnaw nga pagkaon adunay homemade ice cream, juice ug uban pa nga pagkaon nga adunay strawberry ang matilawan.
Walo na ka tuig giugmad sa magpartner nga Paul Yu ug Jo Magallanes ang estroberihan nga nakapa-amaze sa mga turista nga dili na moadto sa Baguio kay naa naman sa Cebu. Pipila lang kini sa mga matahom nga talan-awon sa Sugbo nga padayong nakaani og pagtagad sa mga tawo nga gustong magpalahi pinaagi sa paghanggab sa lab-as nga hangin ug labaw sa tanan maghatag og kagaan sa pagbati.