Editoryal — No tuition fee, no exam policy

Ang edukasyon mao lamang ang bugtong garantiya sa usa ka nasud nga kini magmalambuon ug dunay kaugmaon ang mosunod pa niining mga henerasyon. Napamatud-an kini sa mga adunahan bisan dili dagko nga mga nasud.

Apan kun ang edukasyon dili maabot sa bulsa sa mga kabus ug yanong mga ginikanan para sa ilang mga anak, dili ba kinahanglang tabangan sila sa gobiyerno?

Ang kakulang sa edukasyon sa dakong bahin sa populasyon niini dako og epekto sa ekonomiya sa usa ka nasud. Apan unsaon man kun ang mga maayong kalidad sa edukasyon sa mga pribadong mga eskuylahan ra makuha sa mga tinun-an? Magunsa naman lang ang mga kabus nga dili maka-afford sa mga balayrunon?

Ning bag-o lang, ang asosasyon sa mga pribadong mga eskuylahan mipasidaan nga daghan kanila ang manirado ug daghan ang mawagtangan og trabaho nga mga magtutudlo kun mapasar sa Kongreso ang balaudnong Anti-No Tuition, No Exam policy.

Kini nga polisiya maoy hinungdan sa daghang mga maayo untang mga tinun-an nga nangundang sa pagtungha ug napugos sa pagpanarbo gumikan kay walay ikabayad sa ilang tuition fees.  Daghan sa mga pribadong eskuylahan ang nipatuman ani nga polisiya, nga kun di makabayad ang estudyante dili kini pakuhaon sa og eksaminasyon. Sakit kaayo kini sa buot sa tinun-an ug sa mga ginikanan. Ang uban nangundang og tungha tungod sa kahiubos ug dala na sab sa ilang kapobrehon.

Apan daghan man paagi pagsulbad niini, una, mahimong pakuhaon gihapon og pasulit ang tinun-an apan dili lang una hatagan sa ilang clearance kun di mabayran ang tanang kinahanglang bayaran una pa sila maka-enroll sa sunod tuig o makakuha og school records.

Ikaduha, maghimo og mga programa ang mga local government units paghatag og scholarship programs sa kolehiyo para sa mga estudyante sa high school nga angayang tabangan aron makatungha sa kolehiyo.

Ikatulo, mahimo sab nga magtukod ang mga LGUs ug kaugalingon niining mga kolehiyo nga magtudlo og vocational, technical skills nga accredited sa TESDA ug uban pang mga kurso nga mahimong maeskuylahan sa mga kabus nilang konstituwente. Gawas pa niana, kaning mga state colleges dili unta magpasulabi og higpit sa ilang selection process sa pagdawat og estudyante aron mahatagan og kahigayonan ang kadaghanan sa mga kabus nga pamilya nga makapatungha sa ilang mga anak nga libre o barato ang tuition fees.