Itugyan ko akong espiritu

Human malitok ni Hesus ang “Consummatum est. Natapos na.” Diin, maoy Iyang ipasabot nga natuman na Niya ang tanang misyon nga gisangon sa Iyang Amahan, kinsa maoy nagpadala Kaniya dinhi sa kalibotan aron luwason kitang mga makasasala, sa halawom-ligdong tingog Siya miingon: “Amahan Ko, sa Imong mga kamot itugyan Ko Akong Espiritu!” Sa laktod: Mission is fully accomplished. Bisan gamay walay nakulang.

Mga igsuon, kita usab may iyaiyang misyon. Bisan didto pa kita ilawom sa tagoangkan sa atong inahan, may misyon nang giandam ang Ginoo alang kanato. Mao nga kon moabot na atong kamatayon, inig atubang nato Niya, pangutan-on ta kon gibuhat ba ang misyon nga Iyang giasayin nato?

Ang pait kon wala kitay ikatubag. Or, mosumbalik hinuon sa pag pangutana: “Unsa mang misyona, Lord? Aduna diay?” Kini nagpaila lamang nga kita wala makaila Niya. Nga kita nagpalayo Kaniya.

Sanglit, kon sukad sa atong pagkahimugso nagpaduol na ta Kaniya, makahibalo unta kita niining maong misyon, ang duroha ka kinadak-ang sugo sa Diyos: 1) Higugmaa ang Ginoo sa tibuok nimong kasingkasing, hunahuna ug kalag. 2) Higugmaa imong isig ka tawo sama sa imong kaugalingon. Apan unsaon man nato pagkasayod niini kon kita milikay Kaniya. Dili gani, kaantigo mosimba. Kay ang pagnegosyog mga ilegal, pagyampungad sa sugalan-kahilayan, pagtigom og nagtumpitumping salapi ug bahandi maoy gipaka-Ginoo. Diin, ang lawas ray nabuhong, pero ang kalag gigutom ug nagmasakiton?

Hinumdomi. Kadto rang walay sala ug kadtong makasasala nga kinasingkasing naghinulsol sa ilang kasaypanan ug hingpit nagbag-o sa ilang kinabuhi sa wala pa mamatay, ang makasulod sa gingharian sa Langit. Ug si Hesus, atong Manunubos mihimo gyod og mga tunob o ehemplo dinhi sa yuta aron maoy atong sundon. Buwahan, sama Kaniya, kita mahilangit usab.

Mga igsuon, nasayod na kita kon asa kita paingon kon dili ta makatuman sa atong misyon. Hinungdan, nga si Hesus, kinsa hingpit nakatuman sa Iyang misyon, gaan ug hawot kaayo paminawon ang Iyang gipamarayeg ngadto sa nagsugo Kaniya: “Amahan Ko, sa Imong mga kamot, Itugyan Ko Akong Espiritu!”

Kita kaha, kon ang turno sa atong pagkamatay moabot na ug motugyan sa atong espiritu ngadto sa atong Maghuhukom, dawaton kaha kita Niya? Please, think deeply!